८ महिन्यांत ४... मुंबईतील गोरेगाव येथील हायप्रोफाइल इमारतीत परदेशात जाण्यापूर्वी मुले का करत आहेत आत्महत्या?

मुंबई (सीएससीएन न्यूजडेस्क) : गोरेगाव पूर्वेकडील आरे कॉलनीतील १७ वर्षीय ज्युनियर कॉलेजच्या विद्यार्थिनीने ती राहत असलेल्या ओबेरॉय स्क्वेअर या निवासी संकुलाच्या २३ व्या मजल्यावरून उडी मारून गुरुवारी (१४ ऑगस्ट) दुपारी साडेतीनला आत्महत्या केली. असे म्हटले जात आहे की तिने  बेडरूमच्या खिडकीतून उडी मारली. पोलीस चौकशी करत आहेत. पोलिसांनी सांगितले, की आठ महिन्यांत या निवासी संकुलात आत्महत्येची ही चौथी घटना आहे. मृत्युमुखी पडलेल्यांमध्ये तीन विद्यार्थ्यांचा समावेश आहे. मृतक ही एका मोठ्या रिअल इस्टेट डेव्हलपरची एकुलती एक मुलगी होती. ११ वीत शिकत होती.

घटनास्थळावरून कोणतीही सुसाईड नोट सापडली नसली तरी, प्राथमिक तपासात असे दिसून आले आहे की ती दोन वर्षांपासून नैराश्याने ग्रस्त होती. उपचारही सुरू होते. १५ दिवसांनी ती लंडनला जाणार होती, जिथे तिला पुढील शिक्षणासाठी एका विद्यापीठात प्रवेश मिळाला होता. घटनेच्या वेळी ती २३ व्या मजल्यावरील फ्लॅटच्या तिच्या खोलीत अभ्यास करत होती. आई स्वयंपाकघरात होती तर आजी- आजोबा दुसऱ्या खोलीत होते.

विद्यार्थिनीच्या पालकांच्या मते, नैराश्य हे घटनेमागील मुख्य कारण आहे. पोलीस मुलीचे पालक, मित्र, शाळा आणि उपचार करणाऱ्या डॉक्टरांचे जबाब नोंदवत आहेत. २ जुलै रोजी याच निवासी संकुलात अशीच एक दुःखद घटना घडली होती, १९ वर्षीय अनंत द्विवेदी या विद्यार्थ्याने आत्महत्या केली होती. त्याला जर्मनीतील त्याच्या दीक्षांत समारंभाला जायचे होते. घरी प्रवास परवाना विसरल्यामुळे मुंबई विमानतळावर प्रवेश दिला गेला नव्हता. त्याच्या पालकांना वाटले की तो विमानात बसला आहे. परंतु तो प्रथम जुहू बीचवर गेला. सर्व सामान तिथेच सोडून आत्महत्या करण्याचा प्रयत्न केला. तो प्रयत्न अयशस्वी झाला. त्यामुळे तो घरी परतला आणि ४२ व्या मजल्यावरून उडी मारली.

८ महिन्यांतील चौथी घटना
गेल्या आठ महिन्यांत या गृहनिर्माण संकुलात आत्महत्येची ही चौथी घटना आहे. मृत्युमुखी पडलेल्यांमध्ये तीन विद्यार्थ्यांचा समावेश आहे. या आत्महत्येमागे आणखी काही कारण आहे का हे पोलिस आता शोधण्याचा प्रयत्न करत आहेत.

नैराश्य ग्रस्तांना येथून मदत मिळू शकते
०२२-२७५४६६६९
+९१८४२२९८४५२८,
+९१८४२२९८४५२९,
+९१८४२२९८४५३०