त्रिमूर्ती चौकातील हिरा ज्वेलर्सवाल्याने शूटिंगचे कंत्राट दिले, इव्हेंटवाल्याने ड्रोन उडवले!; गुन्हा दाखल

छत्रपती संभाजीनगर (सीएससीएन वृत्तसेवा) : त्रिमूर्ती चौकात साई हॉस्पिटलच्या शेजारी असलेल्या हिरा ज्वेलर्सच्या मालकाने नुतनीकरण केल्यानंतर उद्‌घाटनाच्या निमित्ताने शूटिंग करण्याचे कंत्राट इव्हेंट मॅनेजमेंट करणाऱ्या युवकाला दिले. त्‍याने शूटिंग करण्यासाठी ड्रोन उडवले. ही बाब तत्‍काळ पोलिसांच्या लक्षात आली. जवाहरनगर पोलिसांनी इव्‍हेंट मॅनेजमेंट करणाऱ्या युवकाविरुद्ध सोमवारी (१० ऑगस्‍ट) गुन्हा दाखल केला आहे.

शुभम भास्कर थोरात (वय २७, रा. चिकलठाणा) असे गुन्हा दाखल झालेल्या युवकाचे नाव आहे. ज्‍यांच्या सांगण्यावरून ड्रोन उडवले, त्‍या दुकानमालकावर मात्र पोलिसांनी कोणतीही कारवाई न केल्याने आश्चर्य व्यक्‍त होत आहे. पोलीस अंमलदार पुंडलिक मानकापे यांनी त्‍याच्याविरुद्ध तक्रार दिली आहे.  छत्रपती संभाजीनगर पोलीस आयुक्तालयाच्या क्षेत्रात विनापरवाना ड्रोन कॅमेरा हवेत उडविण्यास बंदी आहे. तरीही हिरा ज्वेलर्सचे मालक रेवनसिध्द जाधव यांना ड्रोन कॅमेरा उडविल्याद्दल पोलिसांनी विचारणा केली.

त्यावर त्यांनी सांगितले की, माझे हिरा ज्वेलर्स शॉपचे नुतनीकरण केले असून त्याचे उद्‌घाटन असल्याने दुकानाच्या बाहेरील बाजूचे चित्रीकरण व फोटोग्राफी करण्यासाठी भाड्याने फोटोग्राफी व इव्हेन्ट मॅनेजमेंट करणारे शुभम भास्कर थोरात (वय २७, रा. चिकलठाणा) याला कंत्राट दिले आहे. त्याने ड्रोन कॅमेरा हवेत उडवून हिरा ज्वेलर्स शॉपच्या बाहेरून शूटिंग केले आहे. त्यानंतर पोलिसांनी पोलीस आयुक्त कार्यालयातील नियंत्रण कक्षात असलेल्या सेफसिटी प्रकल्पाअंर्गत शहरात बसविलेले CCTV कॅमऱ्याचे ८ ऑगस्टचे फूटेज तपासले. त्यात हिरा ज्वेलर्स त्रिमूर्ती चौक येथे रात्री साडेआठच्या सुमारास एक ड्रोन कॅमेरा हवेत उडताना दिसून आला. अधिक तपास पोलीस अंमलदार संदीप जमधाडे करत आहेत.