मोठी बातमी : केदारनाथ यात्रेला गेलेल्या बजाजनगरच्या भाविकाचा मृत्‍यू, अंगावर दरड कोसळली

छत्रपती संभाजीनगर (सीएससीएन वृत्तसेवा) : केदारनाथ यात्रेला गेलेल्या बजाजनगरच्या ३८ वर्षीय भाविकाचा अंगावर दरड कोसळून आज, १६ ऑगस्टला सकाळी १० च्या सुमारास मृत्‍यू झाल्याची बातमी हाती आली आहे.

परमेश्वर भीमराव खवल (वय ३८, रा. तारांगण सोसायटी, बजाजनगर) असे या भाविकाचे नाव आहे. ते किरायात खोलीत पत्नी, दोन मुली, एक ८ महिन्यांच्या मुलासह राहायला आले होते. हे कुटुंब मूळचे कुठले हे अद्याप समोर आलेले नाही. त्‍यांना केदारनाथ यात्रेला आई-वडिलांनाही घेऊन जायचे होते. रेल्वेचे तिकीट काढण्याआधी आई-वडिलांना विचारले असता, त्‍यांनी आमचे वय झाल्याने चालता येणार नाही, असे सांगितले. त्‍यामुळे परमेश्वर हे एकट्याचेच तिकीट काढून केदारनाथ यात्रेला गेले होते, अशी माहिती समोर येत आहे. ते पायी जात असताना गौरीकुंडहून १ किलोमीटर उंचीवर अचानक दरड कोसळली.

यात परमेश्वर हे सापडले गेले. यंत्रणेने तातडीने त्‍यांना स्थानिक रुग्णालयात दाखल केले. मात्र तोपर्यंत मृत्‍यू झाला होता. तिथल्या पोलिसांनी वाळूज एमआयडीसी पोलीस ठाण्याचे पोलीस निरीक्षक रामेश्वर गाडे यांना कळवले. त्‍यानंतर पोलिसांनी लगेचच परमेश्वर यांचे घर गाठले. त्‍यावेळी घरी त्यांचे वृद्ध आई - वडील होते. दोन मुली शाळेत गेल्या होत्या. पत्नी रक्षाबंधनसाठी भावाकडे गेली होत्या. मात्र मोबाइल घरीच ठेवलेलला होता. पोलिसांनी शेजाऱ्यांच्या मदतीने त्यांच्या मुलीला शाळेतून घरी आणून मोबाइलचे लॉक पॅटर्न खोलून त्यामधून त्यांच्या भावाचा नंबर काढून त्यांना संपर्क साधला. त्यांचे बंधू विमानाने केदारनाथला रवाना झाल्याचे सूत्रांनी सांगितले.