सुसाट हमसफर ट्रॅव्हल्स धडक देऊन पसार, युवकाचा जागीच मृत्‍यू, मिटमिटा येथील घटना

छत्रपती संभाजीनगर (सीएससीएन वृत्तसेवा) : सुसाट हमसफर ट्रॅव्‍हल्स युवकाला उडवून पसार झाली. यात युवक गंभीर जखमी होऊन जागीच मृत्‍यूमुखी पडला. छावणी पोलिसांनी युवकाच्या भावाच्या तक्रारीवरून ट्रॅव्‍हल्सचालकाविरुद्ध शुक्रवारी (१५ ऑगस्ट) गुन्हा दाखल केला आहे.

सय्यद हमीद सय्यद हसन (वय ३३, रा. हनुमान मंदिराजवळ, मिटमिटा) असे मृत्‍यू झालेल्या कुकचे नाव आहे. सय्यद शकील सय्यद हसन (वय २२, रा. हनुमान मंदिराजवळ, मिटमिटा) या तरुणाने या प्रकरणात तक्रार दिली आहे. तो, आई-वडील, मोठ्या भावाची पत्नी तसलीम बी व भाऊ सय्यद हमीद सय्यद हसन असे एकत्र राहतात. मोठा भाऊ मयत सय्यद हमीद हा एस.एस.जी.ढाबा मिटमिटा येथे मागील एक महिन्यापासून कुक म्हणून काम करत होता. सय्यद शकील मजुरी करतो. ९ ऑगस्ट २०२५ रोजी सय्यद हमीद ढाब्यावर सायंकाळी सातला कामाला गेला. १० ऑगस्टच्या पहाटे दीडपर्यंत कामावर होता. नंतर घरी येण्यास निघाला, पाऊस सुरू झाल्याने ढाब्‍यावरच मुक्कामी थांबला. १० ऑगस्टला सकाळी पावणेसातच्या सुमारास ओळखीचे संजू भाऊ घरी आले. त्यांनी सांगितले की, तुझ्या भावाला थोड्या वेळापूर्वी आयशर शोरूमसमोर रोडवर एका ट्रॅव्हल्सवाल्याने उडवले आहे. तू लवकर चल. त्यामुळे संजू नावाच्या व्यक्‍तीसोबत सय्यद शकील लगेचच आयशर शोरूमच्या समोर आला. तेथे सय्यद हमीद गंभीर अवस्थेत पडलेला होता.

त्याला रुग्णवाहिकेतून घाटी रुग्णालयात नेले असता डॉक्‍टरांनी तपासून मृत घोषित केले. गावातील लोकांनी सांगितले, की तुझ्या भावाला एका हमसफर ट्रॅव्हल्स चालकाने मागून जोरात धडक दिली व तो वाहनासह पळून गेला. त्या ट्रॅव्हल्स गाडीचा क्रमांक आबाचा ढाबा यांच्या हॉटेलमध्ये लावण्यात आलेल्या CCTV फूटेजवरून मिळाला. त्यावरून सय्यद शकील याने नातेवाइकांसह मिळून हमसफर ट्रॅव्हल्स कोठे पार्किंग होतात, याची माहिती घेत पार्किंगचे ठिकाण नारेगाव गाठले. तिथे सय्यद हमीदला उडवणारी हमसफर ट्रॅव्हल्स (NL 01 B 2596) उभी होती. सय्यद शकीलने छावणी पोलीस ठाण्यात धाव घेऊन ट्रॅव्‍हल्सचालकाविरुद्ध तक्रार दिली. त्‍यावरून पोलिसांनी गुन्हा दाखल केला आहे. अधिक तपास पोलीस उपनिरीक्षक काकासाहेब नागवे करत आहेत.