सतर्क महिलेमुळे फसला चोरट्यांचा डाव!; एटीएममधील लाखोंची रोकड वाचली, टीव्ही सेंटरवर काय घडलं...

By City News Desk

On 16 Aug 2025

सतर्क महिलेमुळे फसला चोरट्यांचा डाव!; एटीएममधील लाखोंची रोकड वाचली, टीव्ही सेंटरवर काय घडलं...

छत्रपती संभाजीनगर (सीएससीएन वृत्तसेवा) : टीव्ही सेंटरवरील बँक ऑफ महाराष्ट्र शाखेचे एटीएम फोडण्याचा चोरट्यांचा प्रयत्‍न महिलेच्या सतर्कतेमुळे फसला. ही घटना गुरुवारी (१४ ऑगस्‍ट) पहाटे एक ते दोनच्या दरम्‍यान घडली.

गणेश रामदास गारुडकर (वय ३५, रा. उल्कानगरी) यांनी सिडको पोलीस ठाण्यात या प्रकरणात तक्रार दिली आहे. ते बँक ऑफ महाराष्ट्र टीव्ही सेंटर शाखेत नोकरी करतात. बुधवारी (१३ ऑगस्ट) सायंकाळी साडेपाचला ड्युटी संपल्यावर ते आले होते. त्यानंतर गुरुवारी (१४ ऑगस्‍ट) पहाटे एक ते दोनच्या दरम्‍यान बँक शाखेच्या एटीएममधील लाईट गेली होती. दोन चोरट्यांनी एटीएम फोडण्याच्या उ‌द्देशाने आत येत एटीएमचा वॉल्ट लॉक तोडले.

त्‍याचवेळी तेथे वरती राहत असलेले जागेचे मालक अण्णासाहेब आहेर यांच्या पत्नीला आवाज आल्याने त्या घराबाहेर आल्या. त्‍यांनी आवाज दिल्याने दोन्ही चोरटे पळून गेले. गुरुवारी सकाळी साडेआठला अण्णासाहेब आहेर यांनी गारूडकर यांना कळवले. अण्णासाहेब यांच्या पत्‍नीच्या सतर्कमेमुळे चोरट्यांचा डाव फसला. रक्‍कम चोरीला गेली नाही. एटीएममध्ये चोरट्यांनी आणलेला लोखंडी रॉड पडलेला दिसला. पोलिसांनी चोरट्यांविरुद्ध गुन्हा दाखल केला आहे. अधिक तपास पोलीस उपनिरीक्षक अनिल नानेकर करत आहेत.