बिगुल वाजला : मुंबई, छत्रपती संभाजीनगरसह २९ महापालिकांची निवडणूक १५ जानेवारीला!

मुंबई (मेट्रोपोलिस पोस्ट वृत्तसेवा) : दीर्घ काळापासून रखडलेल्या महापालिका निवडणुकांचा बिगुल अखेर वाजला आहे. मुंबई, पुणे, छत्रपती संभाजीनगरसह एकूण २९ महापालिकांची निवडणूक १५ जानेवारीला होणार असून, १६ जानेवारीला मतमोजणी होणार आहे.

राज्य निवडणूक आयोगाचे अध्यक्ष दिनेश वाघमारे यांनी आज, १५ डिसेंबरला पत्रकार परिषद घेऊन निवडणूक कार्यक्रम जाहीर केला. सुप्रीम कोर्टाने याआधीच राज्य निवडणूक आयोगाला ३१ जानेवारी २०२६ च्या आधी निवडणुका घेण्याचा आदेश दिला होता. त्यामुळे आता दुसऱ्या टप्प्यातील निवडणुकीची घोषणा झाली आहे. महापालिका निवडणुकांमुळे राज्‍याचे राजकारण चांगलेच तापणार आहे. पहिल्या टप्प्यात नगर परिषद आणि नगर पंचायतींच्या निवडणुका झाल्या, त्याचे निकाल २१ डिसेंबरला येणार आहेत. निवडणूक आयोगाने ज्या २९ महापालिकांच्या निवडणुकीची घोषणा केली, त्या सर्व महापालिकांची मुदत यापूर्वीच संपली असून, जालना आणि इचलकरंजी या नवनिर्वाचित महापालिका आहेत.

मुंबई महापालिकेत प्रभागात एक सदस्यीय प्रभाग आहे. मुंबई महापालिकेसाठी प्रत्येक मतदाराला केवळ १ मत द्यावे लागेल, तर २८ महापालिका या बहुसदस्यीय आहेत. एका प्रभागात ४ उमेदवार निवडून द्यायचे असून, काही प्रभाग असेही आहेत की, जिथे ३ उमेदवार असतील, तर काही प्रभागात ५ उमेदवार असतील. त्यामुळे या  महापालिकांत मतदारांना साधारणपणे ३ ते ५ मते द्यावे लागतील.
या महापालिकांची होणार निवडणूक
मुंबई, छत्रपती संभाजीनगर, जालना, लातूर, नांदेड-वाघाडा, परभणी, जालना, पुणे, नवी मुंबई, ठाणे, कल्याण-डोंबिवली, वसई-विरार, भिवंडी, मीरा-भाईंदर, उल्हासनगर, पनवेल, पिंपरी-चिंचवड,कोल्हापूर, सांगली, सोलापूर, इचलकरंजी, नाशिक, अहिल्यानगर, धुळे, जळगाव, मालेगाव, नागपूर, अकोला, अमरावती, चंद्रपूर.
असा आहे निवडणूक कार्यक्रम
-नामनिर्देशन पत्र स्वीकारण्याचा कालावधी : २३ ते ३० डिसेंबर
-नामनिर्देशन पत्र छाननी : ३१ डिसेंबर २०२५
-उमेदवारी अर्ज मागे घेण्याची मुदत : २ जानेवारी २०२६
-निवडणूक चिन्ह वाटप आणि अंतिम उमेदवार यादी : ३ जानेवारी २०२६
-मतदान १५ जानेवारी २०२६ रोजी पार पडेल.
-निवडणूक निकाल १६ जानेवारी २०२६ रोजी लागेल.

५ महापालिकांची मुदत २०२० मध्येच संपलेली होती. १८ महापालिकांची मुदत २०२२ मध्ये संपलेली होती. ४ महापालिकांची मुदत ही २०२३ मध्ये संपलेली आहे, असे राज्य निवडणूक आयुक्तांनी सांगितले.
दुबार मतदारांना रोखण्यासाठी उपाययोजना
दुबार मतदारांच्या नावासमोर डबल स्टार असं मार्क करण्यात आलं आहे. संभाव्य दुबार मतदारांच्या घरी जाऊन सर्वेक्षण करण्यात आलं आहे. दुबार मतदारांना विचारून तो कुठल्या मतदान केंद्रावर मत देईल हे लिहून घेण्यात आलं आहे. त्या मतदान केंद्राव्यतिरिक्त त्याला इतर कुठेही मतदान करू दिलं जाणार नाही., असं राज्य निवडणूक आयुक्तांनी स्पष्ट केलं आहे.