बालपणीच्या मैत्रिणीशी चाळीशीत ‘मैत्री’ वाढवणे पडले महागात!, त्याची पत्नी आणि मैत्रीण भिडल्या, तुंबळ हाणामारी, तोडफोड, छत्रपती संभाजीनगरच्या धनमंडीत काय राडा झाला, वाचा...

छत्रपती संभाजीनगर (मेट्रोपोलिस पोस्ट वृत्तसेवा) : बालपणीची मैत्रीण, त्यातल्या त्यात दोघेही एकाच शहरात राहायला..., त्यामुळे मैत्री पुन्हा फुलली... व्हिडीओ कॉल, चॅटिंग सुरू झाले... पण ही बाब त्याच्या पत्नीला रूचली नाही अन्‌ मोठाच राडा झाला. छत्रपती संभाजीनगर शहरातील जुना बाजार धनमंडीतील त्याच्या मैत्रिणीच्या घरी त्याची पत्नी नातेवाइकांसह धडकली आणि तिला जाब विचारला. त्यानंतर दोन्ही गट भिडले. तुंबळ हाणामारी, तोडफोड झाली. दोन्ही गटांतील सारेच कमीजास्त प्रमाणात जखमी झाले. हाणामारीनंतर हा वाद सिटी चौक पोलीस ठाण्यात पोहोचला. दोन्ही गटांच्या परस्परविरोधी तक्रारीवरून पोलिसांनी एकूण २० जणांविरुद्ध गुन्हा दाखल केला आहे. ही घटना शनिवारी (१३ डिसेंबर) दुपारी १ ला घडली.

गारखेडा भागात राहणाऱ्या ४२ वर्षीय कावेरीने (नाव बदलले आहे) दिलेल्या तक्रारीनुसार, त्या कुटुंबासह राहतात. त्यांचे सासर वैजापूर आहे. तिथे घराशेजारी ४० वर्षीय मनिषाचे माहेर (नाव बदलले आहे) आहे. ती कावेरीच्या पतीला लहानपणापासून ओळखते. मनिषा व आपल्या पतीचे प्रेमप्रकरण असल्याचा संशय कावेरीला आहे. कारण तिचा पती मनिषासोबत फोनवर चॅटींग करणे, बोलणे वगैरे करत असतो. शनिवारी दुपारी १ ला कावेरी ही जाऊ, पुतण्या आणि अन्य नातेवाइकांना घेऊन मनिषाच्या घरी धनमंडीत धडकली. घरासमोर जाऊन दरवाजा ठोठावला असता मनिषाने दरवाजा उघडला. सर्व जण घरात जाऊन तिला समजावून सांगू लागले. "कावेरीला तीन लेकरं आहेत, तू तिच्या नवऱ्याचा नाद सोड, ते तुझ्यासोबत फोनवर बोलतात, तुला व्हिडीओ कॉल करतात’, असे तिला म्हणत असताना मनिषाने कावेरीच्या तोंडात चापट मारली व शिवीगाळ करू लागली.

म्हणाली, की मी तुझ्या नवऱ्याचा नाद नाही सोडणार, तुला काय करायचे ते कर, असे म्हणून कावेरीला लाथा बुक्क्याने मारहाण केली. केस ओढले. कावेरीची जाऊ व पुतण्यालाही मनिषा व तिच्या मुलाने शिवीगाळ करून हाताचापटाने मारहाण केली. मनिषाच्या मुलाने बाजूलाच असलेली प्लास्टिकची खुर्ची कावेरीच्या जावेच्या डोक्यात घातली. आरडाओरड ऐकून तेथे आजूबाजूची मुले जमा झाली. ते मनिषाच्या मुलाचे मित्र असल्याने त्यांनीही कावेरी, त्यांचा पुतण्या व जावांना हाताचापटाने मारहाण केली. जीवे मारण्याची धमक्या देऊ लागले.

त्यानंतर ती मुले तळमजल्यावर गेली. तिथून त्यांनी दगडे फेकून मारली. मनिषाच्या मुलाने फेकलेला पाईपचा तुकडा कोवरीला लागून ती जखमी झाली. त्यामुळे कावेरी, त्यांचा पुतण्या आणि जावा हे गॅलरीतून परत घरात आले. घराचा दरवाजा लावून घेतला. त्यानंतर मनिषाचा मुलगा व त्याच्या मित्रांनी दरवाजावर लाथा मारून दरवाजा तोडला. त्यांनी परत मारहाण केली, असे तक्रारीत कावेरी यांनी तक्रारीत म्हटले आहे. त्यावरून पोलिसांनी मनिषा, मनिषाचा मुलगा व त्याचे मित्र अशा एकूण १२ जणांविरुद्ध गुन्हा दाखल केला आहे. 

मनिषाने तक्रारीत काय म्हटलंय...
धनमंडीत राहणाऱ्या ४० वर्षीय मनिषाने तक्रारीत म्हटले आहे, की तिचे माहेर वैजापूर असून, आईच्या घराच्या बाजूला कावेरीच्या पतीचे घर आहे. कावेरीचा पती आणि मनिषा बालपणीचे मित्र- मैत्रिण आहोत. कधीतरी त्यांच्यात फोनवर बोलणे होत असते. शनिवारी दुपारी १ ला मनिषा व त्यांचा मुलगा घरी असताना कावेरी, तिचा पुतण्या, जावा, भावजयी, भाऊ, वडील असे सर्व जण मनिषाच्या घरी आले. कावेरीने ‘माझ्या नवऱ्याशी फोनवर का बोलते’ असे म्हणून मनिषाचे केस पकडून हाताचापटाने मारहाण केली. तिच्या भावजयींनी मनिषाचे हातपाय पकडून हाताचापटाने मारहाण केली. हातावर कावेरीने बोचकारले.

मनिषा यांचा मुलगा भांडण सोडवण्यास मध्ये आला असता त्याला कावेरीच्या भाऊ व वडिलांनी शिवीगाळ करून हाताचापटाने मारहाण केली. बाथरूमच्या दरवाजाला लाथ मारून दरवाजा तोडून नुकसान केले. त्यावेळी मनिषा यांच्या मुलाचा मित्र घरी येऊन वाद सोडवत असताना त्यालादेखील लाथाबुक्क्यांनी मारहाण केली. मनिषा यांचे दोन्ही मोबाइल जमिनीवर आपटून नुकसान केले. घरातील नळाचे पाईप व तोट्या तोडून नुकसान केले व सर्वांनी मिळून जीवे मारण्याची धमकी दिली. या तक्रारीवरून कावेरीसह एकूण ८ जणांविरुद्ध पोलिसांनी गुन्हा दाखल केला आहे. दोन्ही तक्रारींचा तपास पोलीस उपनिरीक्षक संजय राठोड करत आहेत.