मनोज सांगळे, संपादक, मेट्रोपोलिस पोस्ट
छत्रपती संभाजीनगर : छत्रपती संभाजीनगर महापालिकेची शेवटची निवडणूक २०१५ मध्ये झाली होती, त्यावेळी शिवसेनेचे (अविभाजित) २९ नगरसेवक निवडून आले होते, तर ९ नगरसेवकांनी नंतर शिवसेनेत प्रवेश केला होता. त्यामुळे ३८ जागांवर शिंदे गटाने दावा केला आहे. मात्र दावा करताना शिंदे गटाने त्यावेळच्या परिस्थितीची आताच्या परिस्थितीशी तुलना केल्याने भाजप आश्चर्यचकीत झाली आहे. तरीही संयमाने घेत भाजपने घाई न करता चर्चा करून पुढील भूमिका घेण्याचे ठरवले आहे. आताच्या परिस्थितीत राज्यात आणि शहरात भाजप अधिक मजबूत आहे, तर शिवसेनेचे दोन गट झालेले आहेत. बदलत्या राजकीय परिस्थितीमुळे शिंदे गट जास्त जागांवर अडून बसलाच तर स्थानिक पातळीवर युती तुटण्याची शक्यता नाकारता येत नाही. गेल्या निवडणुकीत भाजपचे २३ नगरसेवक होते, तेवढ्या जागा भाजपला आणि उरलेल्या जागांचे समान वाटप, अशी भूमिका शिंदे गटाने घेतली आहे. त्यामुळे भाजपच्या स्थानिक पदाधिकाऱ्यांचे डोके ठणकले आहे.
छत्रपती संभाजीनगर महापालिकेत २९ प्रभागांतून ११५ नगरसेवक निवडून जाणार आहेत. यात ६५ जागा हिंदूबहुल असून, या जागांवर दोन्ही पक्षांत समाधानकारक तडतोड झाली नाही आणि युती तुटली तर हिंदुत्ववादी मतांचे विभाजन होण्याची शक्यता नाकारता येणार नाही. भाजप शहर-जिल्हाध्यक्ष किशोर शितोळे म्हणाले, की स्वबळावर लढण्याचाही पर्याय भाजपने ठेवला आहे. युतीसाठी घाई केली जाणार नाही. दोन्ही पक्षांच्या कोअर कमिटीत चर्चा होईल. सन्मानजनक तोडगा निघाला नाहीतर भाजप पुढचा निर्णय घेईल. काम करणाऱ्या कार्यकर्त्यांवर अन्याय होणार नाही, असे शितोळे म्हणाले.
तर शिंदे गटाचे आ. प्रदीप जैस्वाल आणि जिल्हाप्रमुख राजेंद्र जंजाळ म्हणाले, की गेल्यावेळी भाजप आणि शिवसेनेने जिंकलेल्या जागा त्यांना सोडायच्या आणि उर्वरित जागा समान वाटू घ्याव्यात असा फार्मूला आहे. भाजप- शिंदे गटाचे नैसर्गिक युती असल्याने जागा वाटपावरून वाद होणार नाही, असा दावाही त्यांनी केला आहे. आता शिवसेनेत दोन गट पडले आहेत, याबद्दल छेडले असता आ. जैस्वाल म्हणाले, की शिवसेना अधिकृतपणे आमचाच पक्ष आहे. यामुळे शिवसेनेचे नगरसेवक मागील मनपात किती होते, त्या जागा आमच्या आहेत, असे ते म्हणाले.
भाजपने अवलंबला फुलंब्री फॉर्म्यूला...महापालिका निवडणुकीत सध्या भाजपने फुलंब्री फॉर्म्यूला अवलंबला आहे. एकेका प्रभागात २० ते ३० इच्छुक असल्याने बंडखोरीच्या शक्यतेने भाजपने काळजी घ्यायला सुरुवात केली आहे. त्यांना सोबतच मतदारांच्या भेटीगाठी घेण्यास सूचवले आहे. त्यामुळे एकत्रच सर्व इच्छुक जातात आणि मतदारांना भेटून आमच्यापैकी ज्याला उमेदवारी मिळेल त्याला मतदान करा, अशी गळ घालत आहे. फुलंब्री विधानसभा निवडणुकीत किशोर शितोळे यांच्यासह राधाकिसन पठाडे, सुहास शिरसाट असे निष्ठावंत आणि दिग्गज इच्छुक होते.
मात्र राष्ट्रवादी काँग्रेसतून भाजपात आलेल्या अनुराधा चव्हाण यांना उमेदवारी देण्यात आली. मात्र तोपर्यंत सर्वच इच्छुक एक असल्याने बंडखोरी झाली नाही. हे इच्छुक एकत्रितपणेच सर्व कार्यक्रमांना हजेरी लावायचे, मतदारांच्या भेटी घ्यायचे. हाच फॉर्म्यूला शितोळे यांनी महापालिका निवडणुकीच्या तोंडावर लागू केला आहे. त्यामुळे इच्छुकांकडून हसत खेळत प्रचार होत असल्याचा दावा शितोळे यांनी केला आहे. दरम्यान, आज, १५ डिसेंबर आणि उद्या, १६ डिसेंबला शिंदे गटाच्या पक्ष कार्यालयात इच्छुकांच्या मुलाखती होणार आहेत. ५ जणांची समन्वय समिती मुलाखती घेत आहे. ठाकरे गटाकडून इच्छुकांच्या मुलाखती १७ डिसेंबरला घेण्यात येणार आहेत.
.jpg)
.jpg)
