छत्रपती संभाजीनगर (मेट्रोपोलिस पोस्ट वृत्तसेवा) : मोबाइल बघत असल्याने वडील रागावले. त्यामुळे १६ वर्षीय मुलाने घर सोडले. बराच शोध घेऊनही तो मिळून न आल्याने अखेर पित्याने सिडको पोलिसांत अपहरणाची तक्रार नोंदवली आहे. ही घटना सिडको एन ८ मध्ये शनिवारी (१३ डिसेंबर) सायंकाळी घडली.
खासगी नोकरी करणाऱ्या गृहस्थाने या प्रकरणात तक्रार दिली आहे. ते सिडको एन ८ मध्ये किरायाने पत्नी, मुलगा, मुलीसह राहतात. त्यांचा मुलगा ११ वीत आहे. शनिवारी सायंकाळी साडेसातला ते कामावरून घरी आले असता मुलगा मोबाइल बघत होता. त्याला ते म्हणाले, की मोबाइल बघू नको. अभ्यास कर. दिवसभर कोठे गेला होता, असे म्हणून ते रागावले. सर्व कुटुंब झोपी गेल्यानंतर वडिलांनी मध्यरात्री साडेबाराच्या सुमारास पाहिले असता मुलगा घरातच झोपलेला होता. मात्र पहाटे साडेपाचला तो घरात दिसला नाही. त्याच्या वडिलांनी परिसरात, नातेवाइकांकडे, त्याच्या मित्रांकडे शोध घेतला. मात्र तो मिळून आला नाही. त्याला कुणीतरी पळवून नेल्याची शक्यता व्यक्त त्याच्या वडिलांनी पोलिसांत तक्रार दिली आहे. अधिक तपास पोलीस अंमलदार विमल पवार करत आहेत.
वानखेडेनगरातूनही १७ वर्षीय मुलगा बेपत्ता...वानखेडेनगर एन १३ हडको येथून १७ वर्षीय मुलगा घरातून बेपत्ता झाला आहे. त्याच्या वडिलांनी बेगमपुरा पोलिसांत शनिवारी (१३ डिसेंबर) अपहरणाची तक्रार दिली. त्यावरून पोलिसांनी अपहरणाचा गुन्हा दाखल करून शोध सुरू केला आहे. तक्रारीनुसार, शुक्रवारी सकाळी साडेआठला मुलाचे वडील कामानिमित्त पडेगावला गेले होते. जेवणासाठी दुपारी २ ला घरी आले. त्यावेळी मोठा मुलगा घरी नसल्याने त्यांनी पत्नीला विचारले असता त्यांनी सांगितले, की तो सकाळी साडेअकराला टीव्ही सेंटरला जातो, असे सांगून गेला आहे. दुपारी सव्वादोनला त्याला वडिलांनी कॉल केला असता तो अर्ध्या तासात येतो, असे म्हणाला. मात्र रात्री सव्वाआठनंतर त्याचा मोबाइल बंद येऊ लागला.त्यामुळे त्याच्या वडिलांनी भावाकडे, नातेवाइकांकडे चौकशी केली. तिथेही मुलगा गेलेला नव्हता. त्याला कुणीतरी फूस लावून पळल्याचे तक्रारीत म्हटले आहे. अधिक तपास पोलीस अंमलदार गजानन तुपे करत आहेत.
.jpg)
