छत्रपती संभाजीनगरमध्ये वंचित बहुजन आघाडीच्या उमेदवाराच्या प्रचार रिक्षाची तोडफोड, बॅनर फाडले, उमेदवाराच्या भावाला जातिवाचक शिवीगाळ!

छत्रपती संभाजीनगर (मेट्रोपोलिस पोस्ट वृत्तसेवा) : वंचित बहुजन आघाडीच्या उमेदवार वर्षा जाधव यांच्या प्रचाराच्या रिक्षावर तिघांनी हल्ला करत तोडफोड केली. बॅनर फाडून टाकले. वर्षा यांच्या भावावर धारदार शस्‍त्राने हल्ला करून जखमी केले. जातिवाचक शिवीगाळ केली. ही घटना मंगळवारी (६ जानेवारी) दुपारी साडेचारला प्रभाग क्र. ५ मध्ये घडली.

मिथुन रतन जाधव (वय ३५, रा. घाटी रोड, जेतवन बौद्धविहारामागे, जयभीमनगर) यांनी याप्रकरणात तक्रार दिली आहे. ते रिक्षाचालक असून, त्यांची बहीण वर्षा रतन जाधव (वय २८, रा. जेतवन बौद्धविहार मागे, जयभीमनगर) या महापालिका निवडणुकीत प्रभाग क्र. ५ मधून वंचित बहुजन आघाडीच्या उमेदवार आहेत. वर्षा यांचा प्रचार मिथून हे स्वतःच्या रिक्षाने कायदेशीर परवानगी घेऊन करत आहेत. मंगळवारी मिथून जाधव, किशोर काशीनाथ वाघ हे रिक्षावर भोंगा, पार्टीचे ध्वज,  बाळासाहेब आंबेडकर, सुजात आंबेडकर व उमेदवार वर्षा जाधव यांचे फोटो असलेला बॅनर लावून दुपारी साडेचारला गरम पाणी, प्रकाशनगर, सिद्धार्थ गार्डन जलतरणमागच्या गल्लीत प्रचार करत होते.

तेथे मोटारसायकलीवर अरबाज करीम खान हा दोन व्यक्तींसोबत बसलेला होता. "आज के बाद इस मोहल्ले में आना नही’, असे म्हणून अरबाजने जातिवाचक शिवीगाळ केली. तिघांनी मिळून जाधव यांच्या रिक्षावर लावलेले बॅनर धारदार शस्त्राने फाडले. अरबाजच्या सोबतच्या गुड्डू नावच्या व्यक्तीनेही जाधव यांना यानंतर या भागात यायचे नाही. नाहीतर जीवे मारून टाकू, असे धमकावले. जाधव आणि त्यांच्यासोबतच्या वाघ यांना हाताचापटाने मारहाण केली. जाधव यांच्या ओठावर धारदार वस्तूने मारून जखमी केले. यावेळी लोक जमले होते. त्यांच्याकडून कळले, की अरबाजसोबत अन्सार अन्सारी उर्फ निप्पल व अब्दुल समीर उर्फ गुड्डु (सर्व रा. गरमपाणी) होते. जाधव यांच्या तक्रारीवरून क्रांती चौक पोलिसांनी तिघांविरुद्ध गुन्हा दाखल केला आहे. अधिक तपास सहायक पोलीस आयुक्‍त सागर देशमुख करत आहेत.