छत्रपती संभाजीनगर (मेट्रोपोलिस पोस्ट वृत्तसेवा) : लाचखोर तत्कालीन पोलीस अंमलदार यमाजी लक्ष्मण खटाणे (रा. रेणुकानगर, गारखेडा परिसर) याला शुक्रवारी (६ मार्च) सत्र न्यायाधीश एस. के. कुलकर्णी यांनी ४ वर्षे सक्तमजुरी आणि ५० हजार रुपये दंड ठोठावला. कोविड काळात तंबाखू व पान मसाला विक्रीस मदत करण्यासाठी आणि अटक न करण्यासाठी त्याने १५ हजार रुपयांची लाच घेतली होती.
एका प्लंबरने खटाणेविरुद्ध तक्रार दिली होती. लॉकडाऊनमुळे कामधंदा बंद असल्याने तो एका व्यक्तीकडून तंबाखू व पान मसाल्याचे प्रत्येकी १० मोठे पुडे खरेदी करून शहरातील काही दुकानदारांना विकण्यासाठी दुचाकीवरून जात होता. इंदिरानगर भागात पुंजाबाई चौकाजवळ दोघांनी त्याला अडवून शिवाजीनगर पोलीस चौकीत नेले. पोलिसांनी तंबाखू व पान मसाल्याचे पुडे व ४० ते ४२ हजार रुपयांची रक्कम जप्त केली होती. पोलीस अंमलदार खटाणे याने त्याला मदत करण्यासाठी १५ हजार रुपयांची लाच मागितली. रक्कम न दिल्यास अटक करून हर्सूल कारागृहात पाठवण्याची धमकी दिली होती. त्यानंतर फोन करून १५ हजार रुपये घेऊन पोलीस चौकीत येण्यास सांगितले. प्लंबरने लाचलुचपत प्रतिबंधक विभागाकडे तक्रार केली. एसीबीने सापळा रचून खटाणेला १५ हजार रुपयांची लाच घेताना रंगेहात पकडले. याप्रकरणात जवाहरनगर पोलीस ठाण्यात गुन्हा दाखल झाला होता. एसीबीचे पोलीस निरीक्षक महादेव ढाकणे यांनी तपास करून न्यायालयात दोषारोपपत्र दाखल केले होते.
.jpg)
.jpg)
