मला लाज वाटते... म्हणत ठाकरे गटाच्या पदाधिकाऱ्यांनी क्रांती चौक दणाणून सोडला!, काँग्रेसची शहागंजमध्ये निदर्शने

छत्रपती संभाजीनगर (सीएससीएन वृत्तसेवा) : राज्य मंत्रिमंडळातील अनेक मंत्री वेगवेगळ्या कारणांनी वादग्रस्त ठरले असून, त्‍यांचे राजीनामे घ्यावेत, अशी मागणी करत ठाकरे गटाने सोमवारी (११ ऑगस्ट) क्रांती चौकात जनआक्रोश आंदोलन केले. घोषणांनी परिसर दणाणून गेला होता. दीड तास आंदोलन चालले.

पक्षाचे नेते चंद्रकांत खैरे, आ. अंबादास दानवे यांच्या नेतृत्वाखाली आंदोलन झाले. माझ्या राज्याचा मंत्री नोटांच्या बॅग घेऊन बसतो, मला लाज वाटते.... मंत्री हनी ट्रॅपमध्ये अडकतो, मला लाज वाटते... मंत्री डान्सबार चालवतो- मला लाज वाटते..., रम्मी खेळणाऱ्या मंत्र्याची मला लाज वाटते... माझ्या राज्याचा मंत्री अघोरी जादूटोणा करतो, मला लाज वाटते... भ्रष्टाचारी मंत्र्यांचं करायचं काय? खाली मुंडकं वर पाय... आदी घोषणा आंदोलकांनी दिल्या.

आंदोलनात कन्नडचे माजी आमदार उदयसिंग राजपूत, महानगर प्रमुख राजू वैद्य, संतोष खेंडके, दिग्विजय शेरखाने, राजेंद्र राठोड, दत्ता गोर्डे, संतोष जेजूरकर, नाना पळसकर, विजय वाघमारे, विजय साळवे, अनिल चोरडिया, हरिभाऊ हिवाळे, बाळासाहेब थोरात, सचिन तायडे, गोपाल कुलकर्णी, वीरभद्र गादगे, ज्ञानेश्वर डांगे, बाबासाहेब डांगे, राजेंद्र दानवे, हनुमान शिंदे, किरण तुपे आदींनी सहभाग घेतला. आंदोलनात मला लाज वाटते, हे पथनाट्य सादर करण्यात आले. पथनाट्यात मुलगी डान्स करते आणि तिच्यावर मंत्री नोटा उधळत आहेत, असा प्रसंग दाखवण्यात आला. रमी खेळताना आणि जादूटोणा करत बसलेला मंत्री आणि हनी ट्रॅप हे चित्रही पथनाट्यातून रंगविण्यात आले.

काँग्रेसची शहागंजमध्ये निदर्शने
निवडणुकीत मत चोरीचा आरोप करत विरोधी पक्षांच्या ३०० खासदारांनी संसदेपासून निवडणूक आयोगाच्या कार्यालयापर्यंत सोमवारी (११ ऑगस्ट) मोर्चा काढला. मोर्चा पोलिसांनी अडवून लोकसभेतील विरोधी पक्षनेते राहुल गांधी, प्रियांका गांधी, अखिलेश यादव यांच्यासह अनेक खासदारांना ताब्यात घेतले. त्यांना संसद मार्ग पोलीस ठाण्यात नेले. तिथून त्यांना २ तासांनंतर सोडण्यात आले. या कारवाईच्या निषेधार्थ शहागंज येथील महात्मा गांधी यांच्या पुतळ्याजवळ काँग्रेसतर्फे रास्ता रोको व निदर्शने करण्यात आली. काँग्रेसचे आंदोलन जिल्हाध्यक्ष किरण पाटील डोणगावकर व शहर जिल्हाध्यक्ष शेख युसूफ यांच्या नेतृत्वात करण्यात आले. गांधी भवनात राहुल गांधी यांची पत्रकार परिषद स्क्रीनवर दाखविण्यात आली. या वेळी जगन्नाथ काळे, भाऊसाहेब जगताप, सूर्यकांत गरड, विनोद तांबे, इक्बालसिंग गिल, अनिस पटेल, अतिश पितळे, उमाकांत खोतकर, शेख कैसर बाबा, राहुल सावंत, डॉ. नीलेश आंबेवाडीकर, विशाल बन्सवाल आदींचा सहभाग होता.