छत्रपती संभाजीनगर (मेट्रोपोलिस पोस्ट वृत्तसेवा) : पंतप्रधान नरेंद्र मोदी यांनी देश विकायला काढला असून, देशाचे आर्थिक धोरण सध्या अमेरिकेकडे गहाण ठेवले गेले आहे. मात्र भारतीय जनता पक्षाचा बोलविता धनी असलेला राष्ट्रीय स्वयंसेवक संघ मोदींच्या या धोरणावर बोलायला तयार नाही, असे वक्तव्य वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी छत्रपती संभाजीनगरमध्ये केले. या मुद्द्यांवर २ मार्चला मुंबईत वंचित बहुजन आघाडी धरणे आंदोलन करणार असल्याची माहितीही त्यांनी दिली.
आंदोलनात काँग्रेसने सहभागी व्हावे यासाठी काँग्रेसचे अध्यक्ष मल्लिकार्जुन खरगे आणि खा. राहुल गांधी यांना पत्र दिले आहे. एक तर काँग्रेसने या लढ्याचे नेतृत्व करावे. आम्ही त्यांच्या नेतृत्वाखाली हे आंदोलन करू. नाही तर किमान त्यांनी या लढ्यात सहभाग तरी नोंदवावा, असे आंबेडकर म्हणाले. ॲड. आंबेडकर म्हणाले, मोदी सरकारने रशियाकडून तेल खरेदी बंद केली. राफेलच्या खरेदीबाबतही हेच झाले. ३४० बिलियन डॉलर्सला एक या दराने भारताने राफेल जेटच्या खरेदीचा करार केला. या सर्वांत देशाचे मोठे आर्थिक नुकसान होत आहे. अमेरिकेच्या सांगण्यावरून हे सारे सुरू आहे का, याचा खुलासा सरकारने करायला हवा. एवढेच नाही तर आपल्या सरकारने अमेरिकेसोबत एक करार केला आहे. या अंतर्गत अमेरिकेतून भारतात येणाऱ्या वस्तूंवर कोणताही कर लागणार नाही. मात्र, भारतातून अमेरिकेला निर्यात होणाऱ्या वस्तूंवर १८ टक्के कर लागणार आहे. मोदी सरकार देशाला खड्ड्यात घालणारे असे निर्णय घेत आहे, अशी टीकाही आंबेडकर यांनी या वेळी केली.
.jpg)
.jpg)
