छत्रपती संभाजीनगर (मेट्रोपोलिस पोस्ट वृत्तसेवा) : रोज रोजच्या अश्लील शिवीगाळीने वैतागलेल्या मेंढपाळाने शेतकरी वृद्ध महिलेचा डोक्यात दगड घालून खून केला. २१ फेब्रुवारीला वृद्धेचा मृतदेह आढळला होता. गुरुवारी (२६ फेब्रुवारी) या खुनाचे गूढ उकलण्यात छत्रपती संभाजीनगर स्थानिक गुन्हे शाखेला यश आले. खुन्याला अटक करून करमाड पोलिसांच्या ताब्यात देण्यात आले. शेकट्यातील या खुनाची कहानी...
२१ फेब्रुवारीला करमाड पोलिसांना माहिती मिळाली होती, की शेकटा (ता. छत्रपती संभाजीनगर) शिवारातील शेतात वृध्देचा मृतदेह आढळला आहे. करमाड पोलिसांसह पोलीस अधीक्षक डॉ. विनयकुमार राठोड, अप्पर पोलीस अधीक्षक अन्नपूर्णा सिंह यांनी घटनास्थळी भेट दिली. या वृद्धेचा डोक्यात दगड मारून अत्यंत निर्दयीपणे खून करण्यात आल्याचे दिसून आले. या गुन्ह्याचा समांतर तपास पोलीस निरीक्षक विजयसिंह राजपूत यांच्या मागर्दर्शनाखाली स्थानिक गुन्हे शाखेने सुरू केला. खून झालेल्या वृद्धेचे नाव सुंदराबाई नामदेव जाधव (वय ७५, रा. शेकटा) असल्याचे निष्पन्न झाले. या घटनेत सुंदराबाईंचा मुलगा संजय (वय ५१) यांच्या तक्रारीवरून करमाड पोलिसांनी मारेकऱ्याविरुद्ध गुन्हा दाखल केला होता.
स्थानिक गुन्हे शाखेची ३ पथके व करमाड पोलिसांचे एक पथक अशी ४ पथके गुन्ह्याच्या तपासाला लागली. घटनास्थळाची बारकाईने पाहणी केली. आजूबाजूचा पूर्ण भाग पिंजून काढला. शेकटा गावात, शेतवस्तीवर गुप्त बातमीदार नेमून माहिती घ्यायला सुरुवात केली. वेगवेगळ्या ठिकाणचे सीसीटीव्ही फूटेज तपासले. अखेर गुरुवारी (२६ फेब्रुवारी) पोलिसांना आशेचा किरण गवसला. पोलीस निरीक्षक विजयसिंह राजपूत यांना त्यांच्या गोपनीय बातमीदाराकडून कळले, की घटनेच्या दिवशी २१ फेब्रुवारीला मेंढपाळ दारकुबा बालाजी भाऊले (रा. लाडसावंगी) हा तेथे हजर होता. तो नेहमी त्या परिसरातच मेंढ्यांना घेऊन फिरत असतो. पोलिसांनी लगेचच त्याचा शोध घेतला असता कळले, की बाळू श्रीरंग बुचडे (रा. शेवगा) यांच्याकडे मेंढ्या सांभाळण्यासाठी असलेला दारकुबा २ दिवसांपासून कामाला आलेला नाही, गावी निघून गेला आहे. पोलिसांनी त्याला गोलटगाव येथून त्याच्या नातेवाइकाच्या घरातून ताब्यात घेतले. करमाड पोलीस ठाण्यात त्याला आणून कसून चौकशी करण्यात आली.
त्याने सांगितले, की सुंदराबाई नेहमी मला माझ्या शेतात मेंढ्या का चारतो, माझ्या शेताकडे मेंढ्या चारण्यासाठी आणायच्या नाहीत, असे म्हणून शिवीगाळ करत होती. त्यामुळे मला तिचा खूप राग आलेला होता. २१ फेब्रुवारीलाही तिने शिवीगाळ केली. त्यानंतर काही वेळाने मी तेथील विहिरीवर पाणी पिण्यासाठी गेलो असता ती बोरीच्या झाडाखाली दिसली. त्याठिकाणी कोणीही नसल्याने शेतातील बाजूला पडलेला मोठा दगड घेऊन मी त्या बाईच्या डोक्यात टाकून तिला जीवे मारले, असे सांगितले. करमाड पोलिसांनी त्याला अटक केली. ही कामगिरी पोलीस अधीक्षक डॉ. विनयकुमार राठोड, अप्पर पोलीस अधीक्षक अन्नपूर्णा सिंह यांच्या मार्गदर्शनाखाली उपविभागीय पोलीस अधिकारी पूजा नागरे, स्थानिक गुन्हे शाखेचे पोलीस निरीक्षक विजयसिंह राजपूत, सहायक पोलीस निरीक्षक संतोष मिसळे, सहायक पोलीस निरीक्षक पवन इंगळे, पोलीस उपनिरीक्षक महेश घुगे, पोलीस अंमलदार कासीम शेख, प्रमोद पाटील, विष्णू गायकवाड, सचिन राठोड, विठ्ठल डोके, सुनिल गोरे, गोपाल पाटील, अशोक वाघ, शिवानंद बनगे, अनिल काळे, राहुल गायकवाड, सनी खरात, बलवीर बहुरे, संजय तांदळे, शिवाजी मगर, नीलेश कुडे, संदीप कोळगे, योगेश तरमळे, जीवन घोलप तसेच करमाड पोलीस ठाण्याचे पोलीस निरीक्षक सम्राटसिंह राजपूत, पोलीस उपनिरीक्षक भारत निकाळजे, सोपान डकले, सुनिल लहाने, संतोष चव्हाण यांनी केली.
.jpg)
.jpg)
