छत्रपती संभाजीनगर (मेट्रोपोलिस पोस्ट वृत्तसेवा) : खुलताबादहून छत्रपती संभाजीनगरकडे येत असलेल्या पिता-पुत्राच्या दुचाकीला अचानक माकड धडकून अपघात झाला. यात वडिलांचा हात फ्रॅक्चर झाला असून, मुलालाही जबर मार लागला. ही घटना आज, २७ फेब्रुवारीला दुपारी साडेबाराच्या सुमारास दौलताबाद येथील वन विभागाच्या कार्यालयाजवळ घडली.
सचिन हजारे (वय ३६) आणि त्यांचा मुलगा नैतिक हजारे (वय १५, दोघे रा. खुलताबाद) अशी जखमींची नावे आहेत. ते दुचाकीने (एमएच २०, बीझेड १४८६) खुलताबाद येथून छत्रपती संभाजीनगरला येत होते. दुपारी १२.३० च्या सुमारास दौलताबादमधील वन विभागाच्या कार्यालयाजवळ रस्त्यावर अचानक एक माकड आले. त्यामुळे हजारे हे गोंधळले. त्याचवेळी माकड दुचाकीला धडकले. दुचाकीवरील ताबा सुटून दोघेही रस्त्यावर पडले. दुचाकी घसरत पुढे गेल्याने सचिन हजारे यांचा उजवा हाताला गंभीर जखमा झाल्या व हात फ्रॅक्चर झाला.
नैतिकलाही जबर मुका मार लागला. नागरिकांनी तातडीने मदतीला धावून दोघांना जवळच्या रुग्णालयात हलवले. दौलताबाद परिसरात माकडांचा कायम त्रास असतो. वन विभागाच्या कार्यालयाजवळ आणि ऐतिहासिक स्थळांभोवती माकडे रस्त्यावर येत असल्याने वाहनचालकांना धोका निर्माण होतो. माकडे अन्नाच्या शोधात किंवा वाहनांमधून फेकलेल्या खाऊच्या आकर्षणामुळे रस्त्यावर येतात. वन विभागाने माकडांचा वाढता वावर नियंत्रणात आणण्यासाठी उपाययोजना कराव्यात, अशी मागणी होत आहे. सचिन व नैतिक हजारे यांच्यावर उपचार सुरू असून त्यांची प्रकृती स्थिर असल्याची माहिती मिळाली आहे.
.jpg)
.jpg)
