महापालिकेच्या पथकाची पाठ फिरताच हातगाडीवाल्यांचा पुन्हा ‘शहागंज’वर ताबा!; थातूरमातूर कारवाईने काय होणार, तिथेच ठाण मांडून बसा!!, सामान्यांची मागणी

छत्रपती संभाजीनगर (मेट्रोपोलिस पोस्ट वृत्तसेवा) : महापालिकेच्या अतिक्रमण हटाव पथकाने गुरुवारी (२६ फेब्रुवारी) सकाळी ११:३० ला शहागंज चमन भागात वाहतुकीला अडथळा निर्माण करणाऱ्या हातगाडीवाल्यांना हटविण्यासह, छोटी मोठी अतिक्रमणे बुलडोझरने उद्‌ध्वस्त केली. पथक येताच एरवी मुजोरीचा कळस करणारे हातगाडीवाले गल्लीबोळांत धूम ठोकताना दिसले. चमनच्या आसपास आणि क्लॉक टॉवर येथील चप्पल गल्लीतील ३० पेक्षा अधिक अतिक्रमणांवर बुलडोझर चालला. कारवाई करून पथक जाताच दुपारी अडीचनंतर पुन्हा हातगाडीवाल्यांनी रस्ता व्यापल्याचे दुर्दैवी चित्र दिसले. त्यामुळे ते आता कारवाईलाही जुमानत नसल्याचे दिसून आले. शहागंज मशीद रोड, हिंदी भवन रोड, किराणा चावडीकडे जाणारा रस्ता हातगाडी चालकांनी ताब्यात घेतला होता. एवढेच की रोज बेशिस्त पद्धतीने हातगाड्या लागतात, गुरुवारी त्यात थोडी शिस्त दिसली...

बुधवारी (२५ फेब्रुवारी) दुपारी चारच्या सुमारास शहागंज चमन येथे ४ हातगाडी चालकांनी दाम्पत्याला अमानुष मारहाण केली होती. त्यामुळे शहरभर संतप्त प्रतिक्रिया उमटली. सिटी चौक पोलिसांनी शेख सोहेल बशीर, आदिल कय्युम शेख, इम्रान बशीर शेख, शहबाज शेख यांना अटक करून न्यायालयात हजर केले असता १ दिवसाची पोलीस कोठडी सुनावण्यात आली. शिंदे गटाचे नेते, उपमहापौर राजेंद्र जंजाळ यांनी या घटनेला गांभीर्याने घेत वर्षानुवर्षे शहागंजमध्ये हातगाडीवाल्यांच्या वाढलेल्या मुजोरीला लगाम घालण्याचा निर्णय घेतला. अतिक्रमणांवर तातडीने कारवाई करण्याची सूचना त्यांनी महापालिका आयुक्त जी. श्रीकांत यांना केली. त्यानंतर अतिक्रमण निर्मूलन पथकाला सकाळी ११ वाजता बोलावण्यात आले.

या विभागाचे सनियंत्रण अधिकारी संतोष वाहुळे, उपायुक्त सविता सोनवणे यांच्यासह वॉर्ड अधिकारी, इमारत निरिक्षक सय्यद जमशीद आदींनी सकाळी ११:३० वाजता शहागंज गाठले. पथक आल्याचे पाहून हातगाडीवाले दिसेल तिकडे पळताना दिसले. त्यामुळे ते पथकाच्या हाती लागले नाहीत. १०० हून अधिक हातगाडी चालकांनी धूम ठोकी. त्यानंतर मनपाच्या पथकाने चमनसमोरील एका फळ विक्रेत्यावर कारवाई केली. त्याचे बरेच सामान रस्त्यावर आले होते. चप्पल गल्लीतील व्यापाऱ्यांनी दुकानांसमोर शेड उभारल्या होत्या. ३० पेक्षा अधिक शेड मनपाने काढल्या. त्यामुळे रस्ता मोकळा झाला. मात्र पथक निघून जाताच पुन्हा हातगाडीवाल्यांनी शहागंजवर कब्जा केल्याने महापालिकेच्या पथकाने आता या ठिकाणी तळ ठोकण्याची गरज निर्माण झाली आहे.