मोठी बातमी : जिल्हा परिषद निवडणूक भाजप-शिंदे गट युती करून लढणार, मंत्री सावे, शिरसाटांची घोषणा, सत्तारांमुळे सिल्लोड-सोयगावमध्ये स्वतंत्र लढत, युतीच्या घोषणेनंतर वैजापूर भाजप कार्यकर्त्यांचा राडा!

छत्रपती संभाजीनगर (मेट्रोपोलिस पोस्ट वृत्तसेवा) : महापालिका निवडणुकीत शेवटच्या क्षणी युती तुटली होती. त्याची पुनरावृत्ती होऊ नये, याची खबरदारी भाजप-शिवसेनेने घेत आज, २० जानेवारीला युतीची घोषणा करत जागा वाटपाबद्दलही स्‍पष्टपणे सांगितले. भाजप २७ तर शिवसेना २५ गटांत लढणार असून, तशी माहिती मंत्री अतुल सावे आणि मंत्री संजय शिरसाट यांनी पत्रकारांना दिली. युती झाल्याचे स्‍पष्ट झाल्यानंतर वैजापूरचे भाजप कार्यकर्ते आक्रमक झाले. त्यांनी युती तोडावी म्हणून मंत्री सावे यांच्यावर दबाव आणण्याचा प्रयत्न करत जोरदार घोषणाबाजी केली.

महापालिका निवडणुकांच्या वेळी भाजप-शिवसेनेच्या १२ बैठका होऊनही जागा वाटपावर तोडगा निघाला नव्हता. जिल्हा परिषद निवडणुकीत तसे होऊ नये याची खबरदारी दोन्ही पक्षांच्या नेत्‍यांनी घेतल्याचे दिसून आले. जालना रोडवरील हॉटेल कीजमध्ये आज दुपारी दुसऱ्यांदा भाजप-शिवसेनेच्या नेत्‍यांची बैठक झाली. बैठकीला भाजपच्या वतीने मंत्री अतुल सावे, खा. भागवत कराड, आमदार संजय केणेकर तर शिवसेनेच्या वतीने पालकमंत्री संजय शिरसाट, खा. संदिपान भुमरे, आ. रमेश बोरणारे, आ. संजना जाधव प्रामुख्याने उपस्थित होते.  दोन्ही पक्षांकडे इच्छुकांची संख्या मोठी असल्याने दोन्हींकडून जास्त जागांची मागणी सुरू होती. त्यामुळे मंत्री शिरसाट संतापून बैठकीतून बाहेर पडल्याचे दिसले.

मात्र खा. संदिपान भुमरे यांनी त्यांच्या मागे जात समजूत काढून परत आणले. सिल्लोड-सोयगाव मतदारसंघात आ. सत्तार हे स्वबळावर लढण्याचा हट्ट धरून असल्याने त्या दोन तालुक्यातील ११ जागा वगळता वगळता अन्य ७ तालुक्यांत युतीत ही निवडणूक लढण्याचे ठरले. बिडकीनच्या जागेवर भाजप लढणार असल्याचे भुमरे यांनी पत्रकारांना सांगितले. आमचा प्रत्येक कार्यकर्त्याला न्याय देण्याचा प्रयत्न आहे. युती म्हटलं की, कुठेतरी मागेपुढे होते. युतीचा निर्णय वरिष्ठ पातळीवर झाल्याचे त्यांनी सांगितले.

वैजापूरमधील भाजप कार्यकर्त्यांचा राडा...
सिल्लोडप्रमाणेच वैजापूरमध्येही शिंदे गटाचे आमदार रमेश बोरनारे यांना स्थानिक भाजप कार्यकर्त्यांचा प्रचंड विरोध आहे. त्यातच आठपैकी अवघ्या ३ जागा भाजपच्या वाट्याला आल्याचे कळताच कार्यकर्ते संतप्त झाले. त्यांनी युती तोडा, असा हट्ट धरला आणि त्यासाठी आक्रमक झाले. सावे यांच्या गाडीला घेराव घातला. पोलिसांच्या बंदोबस्तात सावे निघून गेले. कार्यकर्त्यांनी रोष व्यक्त केला. अनेक वर्षे आम्ही निवडणुकीची तयारी करीत होतो. भाजप नेत्यांना शिव्या देणाऱ्या व्यक्तींचे काम आम्ही करायचे का? असा उद्वेग त्यांनी व्यक्त केला.