प्रहार पक्षाचा ९ ऑगस्टला छ. संभाजीनगरात भव्य मोर्चा, आ. बच्‍चू कडू करणार नेतृत्त्व

छत्रपती संभाजीनगर (सीएससीएन वृत्तसेवा) : १७ मागण्यांसाठी प्रहार जनशक्ती पक्षाचा आक्रोश मोर्चा ९ ऑगस्टला क्रांतीदिनी दुपारी १:३० वाजता क्रांती चौकातून विभागीय आयुक्त कार्यालयावर धडकणार आहे. मोर्चाचे नेतृत्व पक्षाचे प्रमुख आमदार बच्चू कडू करणार आहेत. मोर्चाला शहर पोलिसांनी परवानगी नाकारली आहे. मात्र आम्ही छत्रपती संभाजीनगरमध्ये जमणारच. लाखोंच्या उपस्थितीत मोर्चा काढणारच, आम्हाला कोण अडवते ते बघू, असा इशारा आ. बच्चू कडू यांनी दिला आहे.

मोर्चाची तयारी झाली असून, राज्यभरातून दोन लाख दिव्यांग, शेतकरी, शेतमजूर व कष्टकरी सहभागी होतील, असा दावा पत्रपरिषदेत प्रहार पक्षाचे कार्याध्यक्ष बल्लू जवंजाळ यांनी केला. जवंजाळ म्हणाले, की महायुती सरकारमध्ये प्रहार घटक पक्ष असूनही आम्ही मोर्चा काढत आहोत. कारण सरकारची गुलामगिरी आमच्या रक्तात नाही. चुकत असेल तर आम्ही सरकारलाही ठणकावणारच, स्वामीनाथन आयोगाच्या शिफारशींची अंमलबजावणी करा, पेरणी ते कापणीपर्यंतची कामे एमआरईजीएसमार्फत करा, संत्रा, आंबा, काजू, केळी, द्राक्ष या पिकांसाठी विशेष पॅकेज जाहीर करा, घरकुलासाठी शहर व ग्रामीण असा भेदभाव न करता पाच लाखांचा निधी द्यावा, बेघरांसाठी स्वतंत्र निवारा योजना तयार करा यासह १७ मागण्यांसाठी हा मोर्चा निघणार आहे. मोर्चासाठी येणाऱ्यांची निवासाची व्यवस्था मंगल कार्यालये व लॉजमध्ये केली असल्याचेही ते म्‍हणाले. शहराध्यक्ष कुणाल राऊत, जिल्हाध्यक्ष सुधाकर शिंदे, दिव्यांग आघाडी अध्यक्ष शिवाजी गाडे, मराठवाडा अध्यक्ष जे. के. जाधव, संजय देशमुख आदींची यावेळी उपस्थिती होती.