छत्रपती संभाजीनगरजवळील इंग्रजी शाळेला भीषण आग, रविवारच्या सुटीमुळे टळला अनर्थ!

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर तालुक्यातील लाडसावंगी-करमाड रस्त्यावर म्हसोबा फाट्याजवळ, मुरुमखेडा शिवारात एक्सलंट इंटरनॅशनल इंग्लिश स्कूल आहे. या शाळेला रविवारी (१५ मार्च) सकाळी साडेनऊच्या सुमारास भीषण आग लागली. आगीत चार वर्गखोल्या जळून खाक झाल्या. ५ लाखांचे नुकसान झाले आहे. सुदैवाने रविवार असल्याने सुटी होती. त्यामुळे अनर्थ टळला.

शाळेचे संपूर्ण बांधकाम नियमबाह्य असल्याचा आरोप होत असून, मोठ्या प्रमाणात फायबर व प्लास्टिकच्या साहित्याचा वापर करून शाळा उभारल्याचे सूत्रांचे म्हणणे आहे. चार वर्गखोल्या आहेत. शाळेतून धूर निघत असल्याचे नागरिकांनी पाहिले. त्यांनी लगेचच धाव घेऊन आग विझविण्यासाठी प्रयत्न केले. मात्र शाळेचे बांधकाम, दरवाजे, खिडक्या, पत्रे फायबर व प्लास्टिकचे असल्याने आग भडकत गेली. अग्निशमन दलाला कळविण्यात आल्याने त्यांनी तातडीने येऊन आगीवर नियंत्रण मिळवले. तोपर्यंत चार खोल्यांसह शाळेतील साहित्य, संगणक जळून गेले. शाळेत २१९ विद्यार्थी शिकत असल्याचे सांगण्यात आले. शाळा मुख्य रस्त्यावर १०० मीटर आत, आडरानात व वनविभागाच्या डोंगराशेजारी आहे.

शाळेला शॉर्ट सर्किटमुळे आग लागल्याचा प्राथमिक अंदाज आहे. शाळेमागील वनविभागाच्या डोंगरावर आग लागून ती हवेमुळे शाळेकडे आल्याचा दावा संस्थाचालक उत्तम ठोंबरे यांनी केला असून, शाळेत मुलांच्या खेळण्याचे साहित्य प्लास्टिकचे होते. बाकी इमारतीत विटा व पत्र्यांचा वापर केल्याचे त्यांचे म्हणणे आहे. शाळेत आग विझवण्याचे यंत्र आहे. आगीची तीव्रता अधिक असल्याने वर्ग उघडून जाता आले नाही. आग लागल्याने शाळेला पंधरा दिवस सुटी दिल्याचेही ते म्हणाले. वनरक्षक निर्मला बहुरे यांनी सांगितले, की शाळेला लागलेल्या आगीमुळे शेजारील कचरा पेटत येऊन डोंगराकडे आग लागली. ती आम्ही लगेचच विझवली.