पित्राचे जेवण करून शेतात आले, जनावरांना पाणी पाजण्यासाठी शिवना नदीकाठी आले, त्‍याचवेळी काळाने घातली झडप!, कन्‍नड तालुक्‍यातील दुर्दैवी घटना

देवगाव रंगारी (मेट्रोपोलिस पोस्ट वृत्तपत्राच्या सौजन्याने) : लव्हाळी (ता. कन्नड) येथील ४० वर्षीय शेतकरी जनावरांना पाणी पाजण्यासाठी शिवना नदीकाठी गेले असता शेवाळलेल्या जागेवर पाय घसरून नदीपात्रात पडले. यातच त्‍यांचा बुडून मृत्यू झाला. ही घटना शुक्रवारी (१९ सप्‍टेंबर)  दुपारी चारच्या सुमारास घडली.

भारत रावसाहेब डगळे (वय ४०, रा. लव्हाळी) असे मृत्‍यू झालेल्याचे नाव आहे. देवगाव रंगारी पोलीस ठाण्याचे पोलीस अंमलदार साबळे यांनी दिलेल्या माहितीनुसार, भारत डगळे दुपारी पित्राचे जेवण करून शेतात एकच्या सुमारास गेले होते. शेतातील चरत असलेल्या जनावरांना पाणी पाजण्यासाठी शेजारी शिवना नदीकाठी आले. शेवाळलेल्या व निसरड्या जागेवर त्यांचा पाय घसरला. ते खोल प्रवाही पाण्यामध्ये बुडाले. आजूबाजूला कोणीही नसल्याने काही मदत मिळण्याअगोदरच त्यांचा बुडून मृत्यू झाला.

दरम्यान, इतर नातेवाईकांनी बराच वेळ झाला भारत का आले नाही म्हणून शिवना नदीकाठी शोध घेतला असता त्यांना थोडे अंतरावर भारत डगळे यांचा मृतदेह आढळला. ग्रामस्थांनी शिवना नदी काठी धाव घेतली. भरत डगळे यांना देवगाव रंगारी येथील ग्रामीण रुग्णालयात आणण्यात आले. वैद्यकीय अधीक्षक डॉ. नीलेश आहिरराव व वैद्यकीय अधिकारी  डॉ. श्रीमती शेख यांनी तपासून मृत घोषित केले.

उत्तरीय तपासणीनंतर मृतदेह नातेवाईकांच्या ताब्यात देण्यात आला. रात्री सातच्या सुमारास लव्हाळी येथील स्मशानभूमीत अंत्यसंस्कार करण्यात आले. डगळे यांच्या पश्चात आई, वडील, पत्नी एक मुलगा, एक मुलगी असा परिवार आहे. घटनेची नोंद देवगाव रंगारी पोलीस ठाण्यात करण्यात आली आहे. घटनेची माहिती मिळताच रात्री माजी आमदार हर्षवर्धन जाधव यांनी डगळे कुटुंबीयांची भेट घेतली व सांत्वन केले.