छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर शहरातील पडेगाव येथील श्री साईबाबा महिला नागरी सहकारी पतसंस्थेच्या अध्यक्षा उषा गणेश मोरे व उपाध्यक्षा सुशीला राजेंद्र मस्के यांना आर्थिक गुन्हे शाखेच्या पोलिसांनी शुक्रवारी (१४ नोव्हेंबर) बेड्या ठोकल्या. त्यांच्यावर ठेवीदारांची ५० लाख रुपयांनी फसवणूक केल्याचा आरोप आहे. त्यांना न्यायालयात हजर केले असता मंगळवारपर्यंत (१८ नोव्हेंबर) पोलीस कोठडी सुनावण्यात आली.
श्री साईबाबा महिला पतसंस्थेची शाखा दीड वर्षापूर्वी लासूर स्टेशन येथील गीताबनमध्ये सुरू करण्यात आली होती. शाखेत साईनाथ रामराव बनकर (रा. बाभूळगाव नांगरे, ता. गंगापूर) यांनी १० लाख, केदारनाथ नारायण गायकवाड यांनी ७ लाख, ज्ञानेश्वर लक्ष्मण बनकर यांनी ५ लाख, ज्ञानदेव बनताना यांनी १० लाख. उन्नती अरविंद कुलकर्णी यांनी ६ लाख, मनिषा वसंतराव जोशी यांनी ५० हजार, पूजा ज्ञानेश्वर शिंदे यांनी ५ लाख, चंद्रकला सूर्यभान वाकळे यांनी २ लाख अशा सर्वांनी मिळून ५० लाख रुपयांच्या मुदत ठेवी ठेवल्या होत्या. मुदत संपूनही ठेवी परत देण्यास पतसंस्थेकडून टाळाटाळ केली जाऊ लागल्याने ठेवीदारांना शंका निर्माण झाली. अखेर साईनाथ बनकर यांनी २९ जूनला शिल्लेगाव पोलीस ठाण्यात तक्रार केली होती. त्यावरून शिल्लेगाव पोलीस ठाण्यात गुन्हा दाखल झाला होता.
या प्रकरणाचा तपास करत असताना पतसंस्थेच्या अध्यक्षा उषा गणेश मोरे व उपाध्यक्षा सुशीला राजेंद्र मस्के (दोघीही रा. प्लॉट नं. २ सुंदरनगर, पडेगाव, छत्रपती संभाजीनगर) या लासूर स्टेशन भागात आल्याची माहिती आर्थिक गुन्हे शाखेला मिळाली होती. गुरुवारी दुपारी ३:३० वाजता पोलिसांनी त्यांना सापळा रचून अटक केली. त्यांना शुक्रवारी गंगापूर सत्र न्यायालयात हजर केले असता पोलीस कोठडी सुनावण्यात आली. ही कारवाई आर्थिक गुन्हे शाखेचे सहायक पोलीस निरीक्षक अमोल सातोदकर, पोलीस अंमलदार दीपेश नागझरे, जितेंद्र बोरसे, महिला पोलीस अंमलदार आर. एल. मंचुके, पोलीस चालक अंमलदार अजिनाथ तिडके यांनी केली.
या प्रकरणात शिल्लेगाव पोलिसांनी पतसंस्थेच्या पदाधिकाऱ्यांसह संचालक अशा एकूण २० जणांविरुद्ध गुन्हा दाखल केला होता. यात अध्यक्षा उषा मोरे, उपाध्यक्षा सुशीला म्हस्के, मुख्य व्यवस्थापक गणेश रामहरी मोरे, सचिव सौ. गंगासागर अप्पासाहेब शेजवळ, संचालिका सविता गोकुळ मोरे, सरिता रामकिसन म्हस्के, गीता चंद्रकांत चव्हाण, कविता विष्णू सुरडकर, सुजाता सतीश शेरखाने, मंजूश्री दगडू कावळे, पार्वती गणेश रवीवाले, कल्पना नरसिंह माळी, धनश्री योगेश म्हस्के, शीतल रामनाथ नरोडे, रंजना आजिनाथ मोरे, हिराबाई विलास सौदागर, पल्लवी अशोक आघाव, पूजा आदिनाथ नवले, लासूर स्टेशनचे शाखा व्यवस्थापक बळीराम गोरखनाथ मोरे, मुख्य प्रमोटर भरत रामहरी मोरे यांचा गुन्हा दाखल झालेल्यांत समावेश आहे.
