सरकारी नोकरीचे आमिष दाखवून छ. संभाजीनगरच्या भामट्यांचा सिल्लोडच्या १५ जणांना ४९ लाखांचा गंडा

सिल्लोड (मेट्रोपोलिस पोस्ट वृत्तपत्राच्या सौजन्याने) : सरकारी नोकरी लावून देण्याचे आमिष दाखवून भामट्याने १५ बेरोजगारांना ४९ लाख रुपयांनी गंडवले. माझी मंत्रालयात ओळख असल्याचे भामटा सांगत होता. भरत दीनानाथ वाहूळ (रा. गौतमनगर, शासकीय दूध डेअरीसमोर, छत्रपती संभाजीनगर) आणि त्‍याचा साथीदार अंकुश रामलाल पवार (रा. गेवराई तांडा, छत्रपती संभाजीनगर) अशा दोघांविरुद्ध सिल्लोड ग्रामीण पोलिसांनी सोमवारी (८ सप्‍टेंबर) रात्री आठला गुन्हा दाखल केला आहे.

साहेबराव विठ्ठल वाघमोडे (४२, रा. शिंदेफळ, ता. सिल्लोड) यांनी या प्रकरणात तक्रार दिली असून, त्‍यांच्यासह इतर १४ जणांना वाहूळने गंडा घातल्याचे म्‍हटले आहे. ९ डिसेंबर २०२३ ते २ डिसेंबर २०२४ या काळात त्‍याने  सिल्लोड तालुक्यातील १५ बेरोजगार युवकांना हेरून जिल्हाधिकारी कार्यालयांसह विविध खात्यांत लिपिक पदाच्या जागा निघाल्या असून, तेथे, तुम्हाला नोकरी लावून देतो, असे आमिष दाखवले. प्रत्‍येक युवकाकडून १० ते १३ लाख रुपये घेतले. विश्वास बसावा म्हणून त्याने शंभराच्या बॉण्डवर उसनवार पैसे घेत असल्याचे लिहून दिले. काहींना कोरे धनादेशही दिले. वाहूळने फसवल्याचे लक्षात आल्यावर काही युवकांनी धनादेश वटवण्यासाठी बँकेत जमा केले असता ते बाउन्स झाले. बेरोजगार युवकांनी पोलीस अधीक्षक डॉ. विनयकुमार राठोड यांच्याकडे तक्रार दिली. त्यांनी सिल्लोड ग्रामीण पोलिसांना या प्रकरणात कारवाईचे आदेश दिले.

अनेकांना बनावट नियुक्‍तीपत्रे...
वाहूळने चक्क जिल्हाधिकाऱ्यांच्या खोट्या सह्या करून बनावट नियुक्तीपत्रे वाटली. नियुक्‍तीपत्र मिळाल्याने युवक नोकरीच्या ठिकाणी गेले असता ते नियुक्‍तीपत्र बोगस असल्याचे समोर आले. त्‍यामुळे त्‍यांचा आनंद क्षणात मावळला. या प्रकरणाचा तपास उपविभागीय पोलीस अधिकारी डॉ. दिनेश कोल्हे यांच्या मार्गदर्शनाखाली पोलीस उपनिरीक्षक लहू घोडे करत आहेत.