११ वीत शिकणाऱ्या मुलीचा पाठलाग, मैत्री मग प्रेमाचा हट्ट... फोटो व्हायरल करण्याची धमकी, २४ वर्षीय तरुणाविरुद्ध गुन्हा दाखल, वाळूज MIDC तील घटना

By City News Desk

On 09 Sep 2025

११ वीत शिकणाऱ्या मुलीचा पाठलाग, मैत्री मग प्रेमाचा हट्ट... फोटो व्हायरल करण्याची धमकी, २४ वर्षीय तरुणाविरुद्ध गुन्हा दाखल, वाळूज MIDC तील घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : आधी पाठलाग, नंतर मैत्री आणि मग प्रेमाचा हट्ट धरणाऱ्या मजनूविरुद्ध वाळूज एमआयडीसी पोलिसांनी गुन्हा दाखल केला आहे. शनिवारी (६ सप्टेंबर) रात्री दहाला मजनूने थेट तिच्या घरासमोर येऊन माझ्याशी लग्न कर नाही तर तुझ्या कुटुंबाला जीवे मारून टाकेन, अशी धमकी दिल्याने घाबरलेल्या मुलीने पालकांसह पोलीस ठाण्यात धाव घेतली...

किरण मोहन क्षीरसागर (वय २४, रा. महाराणा प्रताप चौक, बजाजनगर) असे संशयित तरुणाचे नाव आहे. मुलगी अकरावीत शिकते. किरण जूनपासून तिच्या मागावर होता. तिच्या पालकांनी तिला खासगी कोचिंग क्लास लावल्याने तिथे तिची ओळख किरणसोबत झाली. त्याने तिला प्रेमाची मागणी घातली. मात्र तिने नकार दिला. तरीही तो तिचा पाठलाग करत होता. अखेर मुलीने आपण मैत्री करू, असे त्याला सांगितले.

काही दिवसांत एका मंदिरात दोघे भेटले. एकमेकांसोबत फोटोही काढले. त्याच वेळी मुलीच्या लक्षात आले, की किरणच्या डोक्‍यातून प्रेम जात नाही. त्‍यामुळे तिने मैत्रीही तोडली. तिने मैत्री तोडल्याने संतापलेल्या किरणने तिचा पाठलाग सुरू केला. तिच्या वडिलांच्या फोनवर कॉल करू लागला. शनिवारी रात्री दहाला तिच्या घरासमोर येऊन राडा केला. फोटो व्हायरल करण्याची धमकी दिली. अधिक तपास वाळूज एमआयडीसी पोलीस करत आहेत.