सिडको पोलिसांच्या सतर्कतेमुळे एटीएममधील रोकड राहिली सुरक्षित!; पोलीस आल्याचे पाहून मोहीम अर्धवट सोडून चोरटे पळाले…

By City News Desk

On 09 Sep 2025

सिडको पोलिसांच्या सतर्कतेमुळे एटीएममधील रोकड राहिली सुरक्षित!; पोलीस आल्याचे पाहून मोहीम अर्धवट सोडून चोरटे पळाले…

छत्रपती संभाजीनगर (सीएससीएन वृत्तसेवा) : सिडको पोलिसांच्या सतर्कतेमुळे जाधववाडी सिग्‍नलजवळील एचडीएफसीच्या एटीएममधील रोकड सुरक्षित राहिली. मुंबईहून ई-सर्व्हिलन्स टीमने कळवताच सिडको पोलिसांनी तातडीने एटीएमकडे धाव घेतली. त्‍यामुळे मोहीम अर्धवट सोडून चोरट्यांना पळ काढावा लागला. ही घटना आज, ९ सप्‍टेंबरला पहाटे चारच्या सुमारास घडली.

एटीएम ऑफिसर नितीन वाघमारे (वय ३४, रा. वडगाव कोल्हाटी, बजाजनगर) यांनी या प्रकरणात तक्रार दिली आहे. त्‍यांना आज, ९ सप्‍टेंबरला पहाटे चारच्या सुमारास मुंबई कार्यालयातून कळविण्यात आले, की छत्रपती संभाजीनगर शहरातील जाधववाडी सिग्नलजवळील देवगिरी बँकेमागे असलेले एचडीएफसी बँकेचे एटीएम दोन चोरटे फोडत आहेत. त्‍यांनी एटीएमचा दरवाजा ग्राइंडरने तोडला व पैसे चोरण्याचा प्रयत्‍न करत आहेत. वाघमारे यांनी लगेचच ही माहिती पोलिसांना दिली. तोपर्यंत मुंबईच्या ई-सर्व्हिलन्स सिडको पोलिसांनाही कळवले होते. पोलिसांनी तातडीने एटीएमकडे धाव घेतली. पोलीस येत असल्याचे पाहून चोरटे पसार झाले. पोलीस आले तेव्हा एटीएमचा दरवाजा तोडलेला होता. मशीनचा डिस्प्ले फोडून नुकसान केल्याचे दिसले. चोरट्यांना एटीएममधील रक्कम काही चोरता आली नाही. अधिक तपास पोलीस अंमलदार मधुकर गोरे करत आहेत.