गल्लेबोरगावजवळ पिकअप -खासगी टेम्पो ट्रॅव्हलरची टक्कर, ९ प्रवासी गंभीर, अजिंठा घाटात दोन ट्रकच्या अपघातात ३ तास वाहतूक कोंडी!

खुलताबाद (मेट्रोपोलिस पोस्ट वृत्तसेवा) : दूध वाहतूक करणारा पिकअप आणि खासगी टेम्पो ट्रॅव्हलर यांच्यात समोरासमोर धडक होऊन ९ जण गंभीर जखमी झाले. हा अपघात सोलापूर-धुळे महामार्गावरील गल्ले बोरगावजवळ (ता. खुलताबाद) शुक्रवारी (२७ फेब्रुवारी) भल्या पहाटे घडली.

गल्ले बोरगावजवळ उड्डाणपुलाच्या कामामुळे वाहतूक एकेरी करण्यात आली आहे. तात्पुरता दुभाजक, रिफ्लेक्टर आणि हायमास्ट दिवे बसवणे अनिवार्य आहे. वारंवार तक्रारी करूनही राष्ट्रीय महामार्ग प्राधिकरणाने याकडे दुर्लक्ष केल्याने हा अपघात घडल्याचे ग्रामस्थांनी सांगितले. चाळीसगाव येथून छत्रपती संभाजीनगरकडे पिकअप (क्र. एमएच १९ बीएम ३०९५) दूध घेऊन जात होता. त्याचवेळी विरुद्ध दिशेने सातारा येथून उज्जैनकडे जाणारा टेम्पो ट्रॅव्हलर (क्र. एमएच १२ व्हीटी ५४९५) येत होता. दोन्ही वाहनांची जोरात धडक झाली. अपघाताच्या आवाजाने ग्रामस्थांनी धाव घेऊन मदतकार्य केले. अपघातात पिकअप चालक दया राठोड (वय २६, रा. चाळीसगाव, जि. जळगाव) व टेम्पो ट्रॅव्हलर चालक विशाल कोळी (वय ३३, रा. सातारा) यांच्यासह टेम्पो ट्रॅव्हलरमधील ९ प्रवासी जखमी झाले. सर्व जखमी साताऱ्यातील आहेत.

अज्ञात वाहनाच्या धडकेने चिमुकल्याचा मृत्यू
ऊसतोडीचा हंगाम ६ वर्षीय मुलाला धडक दिली. यात त्याचा जागीच मृत्यू झाला. ऊसतोडीचे काम संपल्याने आई-वडिलांसह तो पायीच गावाकडे निघाला होता. ही दुर्दैवी घटना छत्रपती संभाजीनगर-पुणे राष्ट्रीय महामार्गावरील कायगाव नजीकच्या जोशी फाट्यावर (ता. गंगापूर)  शुक्रवारी सकाळी १० च्या सुमारास घडली. विशाल अंकुश पवार (रा. पोळ रांजणगाव, ता. गंगापूर) असे मृत्यू झालेल्या बालकाचे नाव आहे.

अजिंठा घाटात तीन तास वाहतूक कोंडी
छत्रपती संभाजीनगर-जळगाव महामार्गावरील अजिंठा घाटात शुक्रवारी सकाळी आठ वाजता दोन ट्रक फसल्याने तीन तास वाहतूक कोंडी झाली. घाटाच्या वळणावरच ही वाहने अडकल्याने दोन्ही बाजूंची वाहतूक ठप्प झाली. ब्रेक निकामी झाल्याने छत्रपती संभाजीनगरहून जळगावकडे जाणारा ट्रक अजिंठा घाटात रस्त्याच्या डोंगराकडील बाजूला असलेल्या नालीत फसला. तरीही वाहतूक हळूहळू सुरू होती. मात्र दुपारी दिल्लीकडे कलिंगड घेऊन जाणाऱ्या दुसऱ्या ट्रकचे ब्रेक निकामी होऊन तो या ट्रकवर धडकून रस्त्याच्या मध्यभागी तिरपा झाला. घाटाचा रस्ता अरूंद असल्याने रस्ताच वाहनांना जायला जागाच उरली नाही. त्यामुळे तीन तास ही वाहतूक कोंडी झाली. अजिंठा लेणी पाहण्यासाठी येणाऱ्या देशी-विदेशी पर्यटकांनाही याचा फटका बसला. फर्दापूर पोलिसांनी अथक परिश्रम घेत ही कोंडी सोडविली.