छत्रपती संभाजीनगरात तोतया पोलीस उपनिरीक्षकाचा तरुणीवर वारंवार लैंगिक अत्याचार!; कोर्टाने सुनावली १० वर्षे सक्‍तमजुरीची शिक्षा

छत्रपती संभाजीनगर (मेट्रोपोलिस पोस्ट वृत्तसेवा) : २४ वर्षीय तरुणीला प्रेमाच्या जाळ्यात ओढून तिच्यावर वारंवार लैंगिक अत्याचार करणाऱ्या अमित लालखा तडवी (२४, रा. गोंदेगाव, ता. जामनेर, जि. जळगाव, ह. मु. छत्रपती संभाजीनगर) याला सत्र न्यायाधीश आर. डी. खेडेकर यांनी शुक्रवारी (२७ फेब्रुवारी) १० वर्षे सक्तमजुरी आणि १५ हजार रुपये दंडाची शिक्षा सुनावली. दंडापैकी १० हजार रुपये पीडितेला नुकसानभरपाई म्हणून देण्याचे आदेशात म्हटले आहे. तडवीने तरुणीला पोलीस उपनिरीक्षक असल्याची बतावणी केली होती.

तक्रारीनुसार, पीडित तरुणीच्या घरात फेब्रुवारी २०२३ पासून तडवी हा किरायाने राहत होता. मे २०२३ मध्ये तिच्या आईवर शस्त्रक्रिया झाली तेव्हा तडवीने तिला मदत करत मैत्री केली. पोलीस उपनिरीक्षक असल्याची बतावणी करून त्याने तिला प्रेमाच्या जाळ्यात ओढले. १९ सप्टेंबर २०२३ रोजी तरुणी घरात एकटी होती. ही संधी साधून त्याने तिच्यासोबत जबरदस्ती शारीरिक संबंध प्रस्थापित केले. तरुणी, तिचा भाऊ, तडवी आणि त्याचा मित्र मुंबईला फिरायला गेले असता तेथे सोबत काढलेले फोटो व्हायरल करण्याची धमकी देऊन तडवी तिला धमकावत पुन्हा पुन्हा लैंगिक अत्याचार करू लागला.

त्याने पोलीस उपनिरीक्षक असल्याचे खोटेच सांगितल्याचे तरुणीच्या समोर आल्यावर तिने १३ फेब्रुवारी २०२४ रोजी त्याला घरातून हाकलून दिले होते. नंतर त्याच्या मित्राने तरुणीला धमकी दिली होती. या प्रकरणात सातारा पोलिसांनी गुन्हा दाखल केला होता. तत्कालिन पोलीस उपनिरीक्षक ई. एस. कामठे यांनी तपास करून दोषारोपपत्र न्यायालयात सादर केले. न्यायालयात ११ जणांचे जबाब नोंदविण्यात आले. यात तरुणीची साक्ष निर्णायक ठरली. न्यायालयाने तडवीला दोषी ठरवून कलम ३७६ (२) (एन) अन्वये १० वर्षे सक्तमजुरी व १० हजार रुपये दंड, कलम ४१७आणि कलम १७० अन्वये एक वर्षाचा कारावास आणि प्रत्येकी २ हजार रुपये दंड आणि कलम ५०६ अन्वये ६ महिन्यांचा कारावास आणि एक हजाराचा दंड ठोठावला.