वाळूतस्करांची नेवाशातून गंगापूरमध्ये घुसखोरी : गंगापूर पोलिसांची मोठी कारवाई, २३ लाखांच्या बोटींसह मशीन जप्त

गंगापूर (मेट्रोपोलिस पोस्ट वृत्तसेवा) : नेवासा तालुक्यातून गंगापूर तालुक्यात घुसखोरी करत गोदावरी नदीपात्रातून अवैध वाळू उपसा करून नेत असलेल्या तिघांच्या २ बोटी आणि वाळू उपशाचे मशीन जप्त करण्यात गंगापूर पोलिसांना यश आले. ही कारवाई मंगळवारी (३० डिसेंबर) रात्री साडेनऊच्या सुमारास गंगापूर तालुक्यातील लखमापूर शिवारात करण्यात आली.

जामगावचे बीट अंमलदार विजय पाखरे यांच्या तक्रारीवरून गंगापूर पोलीस ठाण्यात तिघा वाळूतस्करांविरुद्ध गुन्हा दाखल करण्यात आला आहे. पोलीस निरीक्षक कुमारसिंग राठोड यांना गोपनीय माहिती मिळाली, की काही लोक नेवासा ह‌द्दीतून लखमापूर शिवारात गोदावरी नदी पात्रात येऊन बोटीच्या साह्याने अवैधरित्या वाळू उपसा करत आहेत. तो बोटीच्या साह्याने नेवासा ह‌द्दीत नेऊन विकत आहेत. राठोड यांनी लगेचच सहकाऱ्यांसह लगेचच रात्री साडेनऊच्या सुमारास लखमापूर शिवाराकडे धाव घेतली. तिथे दोन लोखंडी बोट दिसल्या. पैकी एका छोट्या बोटमध्ये एक जण व वाळू उपसा करण्यासाठी वापरली जाणारी मशिन होती. दुसऱ्या मोठ्या बोटींमध्ये दोघे होते. पोलिसांना पाहून तिघेही त्यांच्या बोटी लखमापूर शिवारातील नदीच्या किनारी घेऊन गेले व अंधाराचा फायदा घेऊन पळून गेले. पोलिसांनी वाळू उपसा करण्यासाठी वापरली जाणारी मशिन, दीड ब्रास वाळू, दोन्ही बोटी असा एकूण २३ लाख ९ हजार रुपयांचा मुद्देमाल जप्त केला. अधिक तपास पोलीस उपनिरीक्षक संतोष झोरे करत आहेत. कारवाईत पोलीस उपनिरीक्षक औदुंबर म्हस्के, पोलीस अंमलदार विजय पाखरे, गणेश जाधव, भागवत खाडे व संदीप राठोड यांनी भाग घेतला.