महिलेची हत्या करून पळून जाणाऱ्या मारेकऱ्याला छत्रपती संभाजीनगर रेल्वेस्थानकावर पकडले!

छत्रपती संभाजीनगर (मेट्रोपोलिस पोस्ट वृत्तसेवा) : पंजाबच्या पटियाला जिल्ह्यातील रोंगला गावात ५८ वर्षीय बलजित कौर या महिलेची वैयक्तीक कारणातून हत्या करून पळालेल्या ३ मारेकऱ्यांपैकी मुख्य संशयित गुरविंदरसिंग ऊर्फ गोल्डी नछत्तरसिंग (वय ३४) याला छत्रपती संभाजीनगर रेल्वेस्टेशनवर शहर गुन्हे शाखा आणि लोहमार्ग पोलिसांनी रविवारी (८ मार्च) अटक केली. ९ मार्चला त्याला पंजाब पोलीस येऊन घेऊन गेले.

बलजित कौर १९ फेब्रुवारीला शेतात जात होत्या. रस्त्यात सरपंच पुत्रासह तिघांनी त्यांना अडवले आणि निर्घृण हत्या केली होती. या घटनेमुळे पटियाला जिल्ह्यात मोठ्या प्रमाणात जनरोष निर्माण झाला होता. बलजित यांच्या नातेवाइकांनी मारेकऱ्यांना अटक होईपर्यंत मृतदेह ताब्यात न घेण्याचा पवित्रा घेतला होता. पंजाब पोलिसांवर मोठा दबाव वाढला होता. मुख्य मारेकरी गुरविंदर सिंग सचखंड एक्स्प्रेसने छत्रपती संभाजीनगरच्या दिशेने जात असल्याचे कळताच पंजाब पोलिसांनी छत्रपती संभाजीनगरचे पोलीस आयुक्त प्रवीण पवार यांना संपर्क केला.

पोलीस आयुक्त प्रवीण पवार, पोलीस उपायुक्त रत्नाकर नवले यांच्या सूचनेवरून वरिष्ठ पोलीस निरीक्षक गजानन कल्याणकर, पोलीस उपनिरीक्षक अभिजित चिखलीकर, पोलीस अंमलदार संजय गावंडे, विनोद परदेशी, राजाराम डाखुरे, सागर पांढरे, अमोल मुगळे, लोहमार्ग पोलीस ठाण्याचे सहायक पोलीस निरीक्षक प्रशांत गंभीरराव यांनी रेल्वेस्थानक परिसरात सापळा रचला. रेल्वे येताच गुरविंदरसिंग पळण्याच्या तयारीत असतानाच पोलिसांनी त्याच्यावर झडप घालून अटक केली.