गंगापूर (मेट्रोपोलिस पोस्ट वृत्तसेवा) : किरकोळ बाचाबाचीतून २३ वर्षीय तरुणावर चौघांनी वर्दळीच्या रस्त्यावर धारदार शस्त्राने प्राणघातक हल्ला केला. यात तरुण गंभीर जखमी झाला. ही खळबळजनक घटना गंगापूर शहरातील पंचायत समिती परिसरात झेरॉक्स दुकानासमोर सोमवारी (२३ फेब्रुवारी) दुपारी ४ च्या सुमारास घडली.
अक्षय अनिल बारवाल (वय २३, रा. नूतन कॉलनी, गंगापूर) असे जखमी तरुणाचे नाव आहे. अक्षयचा लहान भाऊ शुभमने (वय २०) दिलेल्या फिर्यादीवरून दीपक साळवे, हर्ष गायकवाड, अशोक मावस, अभिषेक मावस (रा. सर्व म्हाडा कॉलनी, गंगापूर) यांच्या विरुद्ध गंगापूर पोलिसांनी गुन्हा दाखल केला असून, त्यांना अटक करण्यासाठी युद्धपातळीवर शोध सुरू होता. गंभीर जखमी अक्षयला नागरिकांनी गंगापूरच्या उप जिल्हा रुग्णालयात दाखल केले होते, मात्र त्याची प्रकृती चिंताजनक असल्याने छत्रपती संभाजीनगर येथील घाटी रुग्णालयात हलवण्यात आले आहे.
नक्की काय घडलं?अक्षय वैजापूर मार्गावरील पंचायत समिती परिसरात न्यायालयासमोर असलेल्या एका झेरॉक्स दुकानासमोर उभा होता. तेथे आलेल्या हर्ष गायकवाड व अशोक मावस यांच्यासोबत त्याचा किरकोळ कारणावरून वाद झाला. संतप्त हर्षने फोन करून दोघांना बोलावले. ओम्नी वाहनातून दीपक साळवे तर दुचाकीवर अभिषेक मावस आला. दीपक साळवेने खिशातील धारदार शस्त्राने अक्षयच्या पाठीवर हल्ला केला. अक्षय जीव वाचविण्यासाठी पळत रस्ता ओलांडून दुसऱ्या बाजूला गेला. मात्र हल्लेखोरांनी पाठलाग करून त्याच्यावर पुन्हा पुन्हा वार केले. अक्षय रक्ताच्या थारोळ्यात कोसळला. मोठी गर्दी जमल्याने हल्लेखोर पसार झाले. घटनेची माहिती मिळताच पोलीस निरीक्षक कुमारसिंग राठोड, सहायक पोलीस निरीक्षक विठ्ठल झांजुर्णे यांनी सहकाऱ्यांसह घटनास्थळी धाव घेऊन पंचनामा केला. अक्षयवर हल्ला केवळ बाचाबाचीवरून झाला, की पूर्ववैमनस्यातून झाला, हे हल्लेखोरांना पकडल्यानंतरच समोर येणार आहे. सध्या अक्षयची प्रकृती स्थिर असल्याचे पोलिसांनी सांगितले.
1.jpg)
.jpg)
.jpg)
