छत्रपती संभाजीनगर (मेट्रोपोलिस पोस्ट वृत्तसेवा) : वाळूज येथील गुरुदत्त कॉलनीतील गल्ली क्रमांक ३ मधील एका घरात संशयास्पद हालचाली सुरू असतात. रात्रीअपरात्री लोक येतात. दारू पिऊन गोंधळ घालतात. दोन महिलांकडून अनैतिक व्यवसाय सुरू असल्याचा संशय रहिवाशांना असून, यामुळे पूर्ण कॉलनीची बदनामी होत आहे. त्रस्त रहिवाशांनी वाळूज पोलीस ठाण्यात तक्रार अर्ज दिल्याची माहिती सूत्रांनी दिली.
गुरुदत्त कॉलनीत १०० ते १५० नागरिक गुण्यागोविंदाने राहतात. मात्र, काही दिवसांपासून तिसऱ्या क्रमांकाच्या गल्लीतील दोन महिलांकडून अनैतिक व्यवसाय सुरू असल्याचा संशय निर्माण झाला आहे. या महिला बाहेरून महिलांना आणून गैरकृत्य करत आहेत. यामुळे कॉलनील अन्य महिलांचे जगणे अवघड झाले आहे. अनैतिक कृत्याचा संशय असलेल्या महिला गोंधळ घालतात, त्यांच्याकडे येणारे पुरुष दारू पिऊन धिंगाणा घालतात. नागरिकांनी रोखण्याचा प्रयत्न केला, की अश्लील शिवीगाळ व जीवे मारण्याची धमकी दिली जाते, असे रहिवाशांचे म्हणणे आहे.
या महिलांकडे येणारे पुरुष कुणाच्याही घरासमोर थांबतात, वाहने लावतात. रात्रीअपरात्री दरवाजांच्या कड्या वाजवतात. कधीकधी पुरुष मंडळी बाहेर गेलेली असते तेव्हा घरी एकटे राहणाऱ्या गृहिणी याप्रकारामुळे प्रचंड घाबरलेल्या आहेत. पोलिसांनी या प्रकरणाची सखोल चौकशी करून या महिलांवर कारवाई करावी, अशी मागणी रहिवाशांनी केली आहे. या भागातील गृहिणींनी आरोप केला आहे, की दोन संशयित महिलांकडे येणारे लोक आमच्याकडेही वाईट नजरेने पाहतात. त्या महिला येणारे पुरुष नातेवाइक आहेत, असे सांगतात. पोलिसांनी या अनैतिक व्यवसायाला लगाम लावावा, अशी मागणी महिलांनी केली आहे.
1.jpg)
.jpg)
.jpg)
