छत्रपती संभाजीनगर जिल्ह्यात नापिकीचे बळी!; सिल्लोड, पैठणध्ये २ शेतकऱ्यांची आत्‍महत्‍या

By City News Desk

On 16 Dec 2025

छत्रपती संभाजीनगर जिल्ह्यात नापिकीचे बळी!; सिल्लोड, पैठणध्ये २ शेतकऱ्यांची आत्‍महत्‍या

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

पैठण/सिल्लोड (मेट्रोपोलिस पोस्ट वृत्तसेवा) : कर्जबाजारीपणा आणि नापिकीला कंटाळून छत्रपती संभाजीनगर जिल्ह्यात दोन शेतकऱ्यांनी आत्‍महत्‍या केली आहे. सिल्लोड तालुक्‍यातील लिहाखेडी आणि पैठण तालुक्यातील आडगाव जावळे येथे या घटना समोर आल्या. राजेश पांडुरंग लांडगे (वय ४२, रा. लिहाखेडी) व प्रकाश तुकाराम भावले (वय ३३, रा. आडगाव जावळे) अशी आत्‍महत्‍या केलेल्या शेतकऱ्यांची नावे आहेत.

राजेश लांडगे यांनी शुक्रवारी (१२ डिसेंबर) विष पिले होते. कुटुंबीयांनी त्यांना सिल्लोडच्या उपजिल्हा रुग्णालयात दाखल केले होते. प्रकृती गंभीर असल्याने नंतर छत्रपती संभाजीनगरच्या घाटी रुग्णालयात हलविण्यात आले होते. मात्र उपचारादरम्यान रविवारी (१४ डिसेंबर) त्यांचा मृत्यू झाला. त्यांच्या पश्चात आई, वडील, पत्नी, दोन मुले असा परिवार आहे. या प्रकरणी सिल्लोड ग्रामीण पोलिसांनी आकस्मिक मृत्यूची नोंद केली आहे.

प्रकाश भावले यांनी सोमवारी (१५ डिसेंबर) दुपारी दोनला आडगाव जावळे गावाजवळील स्वतःच्या शेतातील आंब्याच्या झाडाला गळफास घेऊन आत्‍महत्‍या केली. त्यांच्यावर भारतीय स्टेट बँकेचे ७० हजार रुपयांचे कर्ज होते. बचत गटाचेही कर्ज होते. त्यांच्याकडे पावणेदोन एकर शेती आहे. अतिवृष्टीमुळे पिकांचे नुकसान झाल्याने कर्ज फेडण्याची चिंता त्यांना सतावत होती. घटनेची नोंद पाचोड पोलिसांनी घेतली आहे. भावले यांच्या पश्चात आई, वडील, पत्‍नी, दोन मुले, मोठा भाऊ असा परिवार आहे.