छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगरमध्ये कत्तलीसाठी आणलेल्या ६ गायी आणि ३ बैलांची सुटका शहर गुन्हे शाखेच्या पोलिसांनी केली आहे. हर्सूल चौकातच पोलिसांनी पिकअप वाहन थांबविण्याचा इशारा केला, मात्र पोलिसांना न जुमानता चालकाने वाहन सुसाट पळवत रेंगटीपुऱ्यात आणले आणि वाहनातील दोघांनी पळून जाण्याचा प्रयत्न केला. पोलिसांनी सिनेस्टाइल पाठलाग दोघांच्या मुसक्या आवळल्या आहेत. ही कारवाई आज (१६ डिसेंबर) पहाटे दीडच्या सुमारास करण्यात आली.
शहर गुन्हे शाखेचे पोलीस अंमलदार मनोज अकोले यांनी याप्रकरणात तक्रार दिली आहे. पोलीस सूत्रांच्या माहितीनुसार, मंगळवारी पहाटे सव्वा बाराच्या सुमारास शहर गुन्हे शाखेचे सहायक पोलीस निरीक्षक विनायक शेळके, पोलीस उपनिरीक्षक जगन्नाथ मेनकुदळे, पोलीस उपनिरीक्षक संदीप काळे, पोलीस अंमलदार दंडवते, शिंदे, मुठे, विखनकर, निकम तसेच विशेष पथकातील पोलीस अंमलदार सोनटक्के, जाधव, बाटे, संपकाळ हे गस्तीवर होते. पोलीस उपनिरीक्षक मेनकुदळे यांना गोपनीय बातमीदाराकडून माहिती मिळाली की, महिंद्रा बोलेरो पिकअपमध्ये (MH 20 GC 7236) अवैधपणे गोवंश जातीच्या जनावरांची कत्तल करण्यासाठी वाहतूक होणार आहे.
त्यामुळे लगेचच पोलीस पथक हर्सूल चौकात पहाटे दीडला येऊन थांबले. संशयित वाहन फुलंबीकडून आलेले दिसले. पोलिसांनी वाहनचालकाला थांबण्याचा इशारा केला. मात्र त्याने न थांबता वाहन भरधाव दिल्लीगेटच्या दिशेने पळवले. त्यामुळे पोलिसांनी त्याचा पाठलाग सुरू केला. वाहनचालक उद्धराव पाटील चौक, कलेक्टर ऑफिस, चंम्पाचौक, मार्गे रेंगटीपुरा चौकात वेळ पहाटे दोनला थांबला आणि त्यातील चालक व सोबतचा व्यक्ती पळून जाण्याचा प्रयत्न करीत होते. पोलिसांनी त्यांना पाठलाग करून पकडले. यात ते खाली पडून जखमी झाले. गाडी चालवऱ्याचे नाव विचारले असता त्याने शोहेब ख्वाजा कुरेशी (वय २१, रा. दर्गाजवळ, सिल्लेखाना, छत्रपती संभाजीनगर) व सोबतच्या व्यक्तीचे नाव सोहेल अलताफ कुरेशी (वय २०, रा. रहेमानिया कॉलनी, किराडपुराजवळ, छत्रपती संभाजीनगर) असे सांगितले.
पोलिसांनी पिकअपची पाहणी केली असता त्यात ६ गायी आणि ३ बैल दाटीवाटीने, निर्दयीतेने कोंबलेले दिसले. पोलिसांनी पिकअप वाहन, मोबाइल असा एकूण ५ लाख ५ हजार रुपयांचा मुद्देमाल जप्त केला. शोहेब व सोहेलने पोलिसांना सांगितले, की फय्याज खलील कुरेशी (रा. सिल्लेखाना छत्रपती संभाजीनगर) याच्या मालकीची जनावरे असून, ती कत्तलीसाठी आणली आहेत. पोलिसांनी गायी, बैल बेगमपुऱ्यातील गुरुगणेश गोशाळेत दाखल केले. शोहेब, सोहेलसह फय्याज खलील कुरेशी, वाहनमालक, जनावरे विक्री करणारा व्यक्ती अशा चौघांविरुद्ध जिन्सी पोलीस ठाण्यात गुन्हा दाखल केला आहे. अधिक तपास पोलीस अंमलदार भास्कर घोडके करत आहेत.
.jpg)
