आ. सत्तारांचे धाकटे पूत्रही उतरणार राजकारणाच्या आखाड्यात?

सिल्लोड (मेट्रोपोलिस पोस्ट वृत्तसेवा) : सिल्लोडचे आमदार अब्दुल सत्तार यांचे धाकटे पूत्र अब्दुल आमेर हेही राजकारणाच्या आखाड्यात उतरणार असल्याची चर्चा सुरू झाली आहे. यासाठी जिल्हा परिषद निवडणूक संधी मानली जात असून, त्यांनी अंभई गटातून निवडणूक रिंगणात उतरण्याची तयारी सुरू केल्याचे सांगण्यात येत आहे.

मंत्री सत्तार यांनी सिल्लोड नगराध्यक्षपदासाठी थोरले पूत्र अब्दुल समीर यांचे नाव जाहीर केल्यानंतर घराणेशाहीची टीका झाली होती. संपूर्ण निवडणुकीत हा मुद्दा विरोधकांनी चर्चेत ठेवला. मात्र समीर हे नगराध्यक्ष झालेच. त्यानंतर आता मोठ्या भावाच्या पावलावर धाकटा भाऊ पाऊल ठेवत राजकारणात उतरणार असल्याची चर्चा आहे. त्यांचे वडील अब्दुल सत्तार हे महाराष्ट्रातील राजकारणातील केंद्रस्थानी असतात. आ. सत्तार यांनी १९८४ मध्ये ग्रामपंचायत सदस्य म्हणून राजकीय कारकिर्दीला सुरुवात केली. नगराध्यक्ष, आमदार आणि मंत्री अशा विविध पदे अशी विविध पदे त्यांनी भूषविली.

त्यांच्या पत्नी नफीसा बेगम याही २००१ ते २०१६ अशा तब्बल १६ वर्षे सिल्लोडच्या नगराध्यक्ष राहिल्या आहेत. २०१७ मध्ये अब्दुल समीर नगराध्यक्ष झाले. आता पुन्हा ते नगराध्यक्ष झाले आहेत. आता वेळ आली आहे ती धाकटे पूत्र अब्दुल आमेर निवडणूक रिंगणात उतरण्याची. अंभई जिल्हा परिषद गटातून ते शिंदे गटाकडून निवडणूक लढवू शकतात, असे सांगितले जात आहे. आता त्यांनी राजकारणापासून दूर राहणे पसंत केले. शिक्षण संस्था, सूतगिरणीची कामे त्यांनी पाहिली. आता ते राजकारणात येत असल्याने भाऊ आणि वडिलांप्रमाणे त्यांना यश मिळते का, हे पाहणे रोचक ठरणार असून, विरोधकांना पुन्हा एकदा सत्तारांच्या घराणेशाहीवर टीका करायला संधी मिळू शकते.