२१ वर्षीय तरुणाला ६ जणांनी घेरून केली अमानुष मारहाण!, वैजापूर तालुक्यातील घटना, ॲट्रॉसिटीचा गुन्हा दाखल

छत्रपती संभाजीनगर (मेट्रोपोलिस पोस्ट वृत्तसेवा) : २१ वर्षीय तरुणाला सहा जणांनी घेरून अमानुष मारहाण केली. वैजापूर पोलिसांनी ६ जणांविरुद्ध ॲट्रॉसिटीचा गुन्हा दाखल केला आहे. ही घटना शनिवारी (१७ जानेवारी) रात्री साडेनऊच्या सुमारास वैजापूर- गंगापूर रोडवरील समृध्दी महामार्गाच्या पुलाजवळील वखार महामंडळाचे अलीकडील एच.पी. पेट्रोलपंपावर घडली.

अनिकेत गौतम पठारे (वय २१, रा. आधूर ता. वैजापूर) या तरुणाने या प्रकरणात तक्रार दिली आहे. तो दुसऱ्यांच्या गाडीवर क्लिनर म्हणून कामावर जातो. तक्रारीत अनिकेतने म्हटले आहे, की रोहन साठे व संकेत साठे (रा. जांबरगाव) यांच्या पिकअप गाडीवर पाच ते सात महिन्यांपूर्वी दोन महिने क्लिनर होता. तेव्हा त्यांचे घरी जाणे- येणे होते. गाडी कामावर असताना निखील निकम (रा. उक्कडगाव ता. कोपरगाव जि. अहिल्यानगर) याच्याशीही अनिकेतची ओळख झाली. त्यांचे काम सोडल्यानंतर फोनवर बोलचालीमध्ये रोहन, संकेत आणि निखिलने अनिकेतला शिवीगाळ करून धमकी दिली होती.

शनिवारी (१७ जानेवारी) अक्षय खिल्लारे (रा. नादी विरगाव) याच्या पिकअप गाडीसोबत अनिकेत गेला होता. रात्री साडेनऊच्या सुमारास वैजापूर- गंगापूर रोडवरील समृध्दी महामार्गाच्या पुलाजवळील वखार महामंडळाचे अलीकडील एच.पी. पेट्रोलपंपावर त्यांनी गाडीत डिझेल भरले. त्याचवेळी तिथे रोहन, संकेत, निखील त्यांच्या पिकअपने आले होते. अनिकेतला बघून ते त्याच्या अंगावर धावून आले. त्यांच्यासोबतच्या आणखी तीन अनोळखी तरुणांनी येऊन अनिकेतला शिवीगाळ करत सर्वांनी मिळून मारहाण सुरू केली. रोहन व संकेत यांनी त्यांच्या गाडीतून दोन लाकडी काठ्या आणून अनिकेतच्या पाठ, मान आणि हातावर जोरजोराने मारहाण करून दुखापत केली.

निखील व तीन अनोळखी तरुणांनी लाथा, चापटबुक्क्यांनी मारहाण करून जीवे मारण्याची धमकी दिली. अक्षय खिल्लारे याने अनिकेतला वाचविण्याचा प्रयत्न केला. वैजापूर पोलीस ठाण्यात तक्रार देण्यासाठी येतानाही रोहन, संकेत, निखीलने त्याला मोबाइल नंबरवर कॉल करून धमकी दिली, असेही तक्रारीत म्हटले आहे. वैजापूरच्या सरकारी रुग्णालयात उपचार घेतल्यानंतर अनिकेतने पोलिसांत तक्रार दिली. त्यावरून पोलिसांनी रोहन, संकेत, निखीलसह ३ अनोळखी तरुणांविरुद्ध गुन्हा दाखल केला आहे. अधिक तपास पोलीस निरीक्षक भागवत फुंदे करत आहेत.