कन्नड (मेट्रोपोलिस पोस्ट वृत्तसेवा) : धारदार हत्याराने गुप्तांग आणि डोक्यात वार करून राजू रामचंद्र पवार (वय ४५, रा. जामडी फॉरेस्ट, ता. कन्नड) यांची १३ जानेवारीला सकाळी हत्या करण्यात आली होती. या हत्येचा उलगडा करण्यात छत्रपती संभाजीनगर ग्रामीण पोलिसांच्या स्थानिक गुन्हे शाखेला यश आले आहे. ही हत्या शारीरिक संबंधाच्या मागणीला कंटाळून गावातीलच महिलेने तिच्या मुलासोबत मिळून केल्याचे समोर आले आहे. महिलेकडे राजू पवार शारीरिक संबंध ठेवण्याची मागणी करत होता. ते महिलेला मान्य नव्हते. त्याच्या मागणीला ती कंटाळली होती, असे तिने पोलिसांना सांगितले.
वंदना राजू पवार (वय ४५) आणि तिचा मुलगा धीरज उर्फ टेमा राजू पवार (वय १८, दोघे रा. जामडी फॉरेस्ट) अशी संशयित मायलेकाची नावे आहेत. जामडी फॉरेस्ट शिवारातील गट नं. ९५ मध्ये नाल्याच्या साठवण पाण्यात बेहडाच्या झाडाखाली उघड्या असलेल्या मुळीला अंगात असलेल्या जॅकेटने अडकवून ठेवलेला राजू यांचा मृतदेह आढळला होता. राजू पवार यांचे वडील रामचंद्र पवार पाच वर्षांपूर्वी सरपंच होते. सध्या त्यांच्या काकू रेणुका पवार सरपंच आहेत. राजू पवार हे वडिलांनंतर काकूंच्या बहुतांश शासकीय कामकाजाची जबाबदारी पाहत होते. हत्या आधी राजकीय वैमनस्यातून झाल्याचा संशय व्यक्त होत होता. मात्र काही वेगळेच निघाले. राजू पवार १३ जानेवारीला सकाळी ८ च्या सुमारास युनिकॉर्न दुचाकीवरून नेहमीप्रमाणे शेतात गेले. सकाळी १० पर्यंत घरी जेवणासाठी न आल्याने त्यांची पत्नी कडूबाई यांनी दिराला सांगितले. राजू यांचा मोबाइलही बंद येत होता. त्यामुळे दीर प्रकाश पवार हे गावातील काही लोकांसोबत राजू यांचा शोध घेण्यासाठी शेतात गेले. राजू यांची दुचाकी नदीच्या काठावरील वडाच्या झाडाजवळ उभी होती. राजू दिसून येत नसल्याने शोध घेत असताना लगतच्या जंगलात त्यांचा मोबाइल फुटलेल्या अवस्थेत कोळ नदीच्या काठावर व पायातील चप्पल मोहाच्या झाडाजवळ मिळून आली.
गावात गुप्तहेर पेरले...
राजू यांचा मृतदेह डवळ नाल्याच्या पाण्यात आढळला. अंगात पँट व अंडरपँट नव्हती. गुप्तांग व अंडाशयाला गंभीर जखमा होत्या. पोलीस पाटील निर्मला पवार यांनी कन्नड ग्रामीण पोलिसांना कळवले होते. या प्रकरणात राजू यांचे मोठे भाऊ प्रकाश यांच्या तक्रारीवरून खुनाचा गुन्हा दाखल करून कन्नड ग्रामीण पोलिसांनी तपास सुरू केला. या गुन्ह्याचा समांतर तपास स्थानिक गुन्हे शाखाही करत होती. राजकीय घराणे असल्याने या हत्येचे गांभीर्य वाढले होते. तपासात भाषेची अडचण येत होती. पोलीस निरीक्षक विजयसिंह राजपूत यांनी बंजारा भाषा अवगत असणाऱ्या व्यक्ती आणि महिलांची गुप्तपणे गावात नेमणूक केली. त्यातूनच वंदना पवारचे नाव समोर आले.
वंदनाने गुप्तांग दाबले, धीरजने डोक्यात घातले शस्त्राचे वार...
पोलीस अधीक्षक डॉ. विनयकुमार राठोड यांच्या मार्गदर्शनाखाली स्थानिक गुन्हे शाखेने संशयावरून वंदना पवार हिला ताब्यात घेतले आणि विचारपूस सुरू केली. सुरुवातीला ती उडवाउडवीची उत्तरे देत होती. मात्र कसून चौकशीत तिने खुनाची कबुली दिली. तिने सांगितले, की गावातून शेतात जात असताना राजू पवारला इशाराला करून मी शेताकडे येण्यास सांगितले. तो मला भेटण्यासाठी शेताजवळील झाडीत आला. तो शारीरिक संबंध करण्यासाठी कपडे काढत असताना माझ्या मुलाने त्याच्या डोक्यात मारले. मी त्याचे गुप्तांग दाबून त्यास मारले. नंतर पुरावे नष्ट करण्यासाठी मोबाइल, अंडरपँट, चपला वेगवेगळ्या ठिकाणी फेकली. त्यांनी दृश्यम चित्रपट आणि क्राइम पेट्रोल मालिका पाहून पुरावा नष्ट करण्याचा प्रयत्न केल्याची कबुली दिली. राजू यांच्या पश्चात पत्नी, मुलगा, मुलगी, आई-वडील असा परिवार आहे.
ही कारवाई पोलीस अधीक्षक डॉ. विनयकुमार राठोड, अप्पर पोलीस अधिक्षक अन्नपूर्णा सिंह, सहायक पोलीस अधीक्षक अपराजिता अग्निहोत्री यांच्या मार्गदर्शनाखाली पोलीस निरीक्षक विजयसिंह राजपूत, सहायक पोलीस निरीक्षक पवन इंगळे, सहायक पोलीस निरीक्षक सुधीर मोटे, पोलीस उपनिरीक्षक महेश घुगे, पोलीस अंमलदार विष्णू गायकवाड, रवि लोखंडे, प्रमोद पाटील, अशोक वाघ, शिवानंद बनगे, सुनिल गोरे, सचिन राठोड, दीपक सुरोसे, जनाबाई चव्हाण, महेश बिरुटे, अनिल काळे, बलविरसिंग बहुरे, योगेश तरमाळे, जीवन घोलप, गणेश घोरपडे, राजेश राठोड, संजय तांदळे, नीलेश कुडे, शिवानी मगर तसेच कन्नड ग्रामीण पोलीस ठाण्याचे सहायक पोलीस निरीक्षक रामचंद्र पवार, पोलीस उपनिरीक्षक अमोल जाधव, पोलीस अंमलदार अजय मोतिंगे, कैलास करवंदे, धीरज चव्हाण, लक्ष्मण गवळी, दिलवरसिंग वसावे, बाबासाहेब धनुरे, सविता सोनवणे, मोनिका सिरसाठ यांनी केली.
.jpg)
.jpg)
