१६ वर्षीय मुलीचे ६० वर्षीय वृद्धाकडून वारंवार लैंगिक शोषण!; करमाडच्या घटनेने खळबळ

छत्रपती संभाजीनगर (मेट्रोपोलिस पोस्ट वृत्तसेवा) : १६ वर्षीय मुलीवर ६० वर्षीय वृद्धाने लैंगिक अत्‍याचार केल्याची धक्कादायक घटना करमाड पोलीस ठाण्याच्या हद्दीतील एका गावात समोर आली आहे. नराधम मुलीच्या आईचा गुरुवडील आहे. करमाड पोलिसांनी गुन्हा दाखल करताच वृद्ध फरारी झाला असून, पोलीस त्याचा कसोशीने शोध घेत आहेत.

दिगंबर गव्हाणे असे संशयित वृद्धाचे नाव आहे. तक्रारीनुसार, दिगंबरचे मुलीच्या घरी नियमित येणे-जाणे होते. त्याने गेल्या वर्षी मे, जून आणि जुलै महिन्यात जीवे मारण्याची धमकी देत मुलीवर वारंवार लैंगिक अत्याचार केला. मुलगी घरी एकटी असल्याचे पाहून तो यायचा आणि तिला तसेच तिच्या आई-वडील व भावाला जीवे मारण्याची धमकी देऊन तिच्यावर जबरस्ती करायचा. घाबरून मुलीने ही बाब कुणालाच सांगितली नाही. रविवारी (१ फेब्रुवारी) पहाटे अचानक मुलीला पोटदुखी सुरू झाल्याने कुटुंबीयांनी तिला पिंप्रीराजा येथील खासगी रुग्णालयात आणले. अचानक प्रसुती कळा सुरू होऊन तिने मुलाला जन्म दिला. घटनास्थळी पोलीस निरीक्षक सम्राटसिंह राजपूत व पोलीस उपनिरीक्षक दगडू तडवी यांनी भेट दिली. दिगंबरचा शोध युद्धपातळीवर सुरू आहे.

सोशल मीडियावर तरुणीची बदनामी
सोशल मीडियावर बनावट खाते तयार करून तरुणीची बदनामी करणाऱ्याविरुद्ध वैजापूर पोलिसांनी मंगळवारी (३ फेब्रुवारी) गुन्हा दाखल केला. विजय नरवाडे (रा. श्रीरामपूर, जि. अहिल्यानगर) असे संशयिताचे नाव आहे. त्याने वैजापूर पोलीस ठाण्याच्या हद्दीतील एका गावातील २० वर्षीय तरुणीच्या नावे बनावट इन्स्टाग्राम खाते सुरू केले होते. अश्लील फोटो व अश्लील मेसेज त्याने त्यावर पोस्ट केले होते. ही बाब लक्षात आल्यानंतर तरुणीने वैजापूर पोलिसांत धाव घेतली.