हिट ॲन्ड रन : महिला चालवत असलेल्या सुसाट कारने दुचाकीला उडवले, ३ जखमी, गादिया विहारजवळील घटना, कारचा नंबर आहे... 

छत्रपती संभाजीनगर (मेट्रोपोलिस पोस्ट वृत्तसेवा) : महिला चालवत असलेल्या सुसाट कारने दुचाकीला उडवले. मदतीला न थांबता वेगाने कार घेऊन निघून गेली. ही घटना गादिया विहार- शिवाजीनगर रस्‍त्‍यावरील CSM हॉस्पिटलसमोर शनिवारी (३१ जानेवारी) सायंकाळी सातच्या सुमारास घडली.

रवींद्र कैलासनाथ चौधरी (वय ३६, रा. आशानगर, पंडीत जवाहरलाल नेहरू कॉलेजसमोर, शिवाजीनगर छत्रपती संभाजीनगर) यांनी या प्रकरणात तक्रार दिली आहे. तक्रारीत म्हटले आहे, की ते टाईल फिटींगची कामे करतात. शनिवारी (३१ जानेवारी) कांचनवाडी येथे टाईल फिटींगची कामे करून सायंकाळी सातला मोटारसायकलीने (MH 20 BF7428) सहकारी प्रभाकर चौधरी व राहुल यादव यांच्यासह कांचनवाडीकडून शिवाजीनगरला येत होते. देवळाई चौकात नेहमी गर्दी असते. त्यामुळे ते हॉटेल निशांत पार्कजवळून डावीकडे वळवून पीडब्ल्यूडी कॉलनीतून शहानुरमिया दर्गाजवळील रेल्वे बोगद्यातून गादिया विहारमार्गे शिवाजीनगरकडे जाण्यासाठी वळले.

CSM हॉस्पिटलसमोर त्यांच्या मोटारसायकलीला कारने (MH 01 DE 3680) च्या महिला चालकाने जोरात धडक दिली. यात चौधरी हे मोटारसायकलीसह पडून दोन्ही हातांना, पायांना खरचटून जखमा झाल्या. छातीला गंभीर मुक्का मार लागला. चेहऱ्याचे हाड फ्रॅक्चर झाले आहे. त्यांच्यासोबत असलेल्या प्रभाकर चौधरी व साहुल यादव यांनासुध्दा बराच मार लागला. लोकांनी मदतीला धावून तिघांनाही CSM  हॉस्पिटलमध्ये दाखल केले. कारचालक महिला कोणत्याही प्रकारची मदत न करता तेथून निघून गेली, असे तक्रारीत म्हटले आहे. अधिक तपास पोलीस अंमलदार पृथ्वीराज चव्हाण करत आहेत.