छत्रपती संभाजीनगर (सीएससीएन वृत्तसेवा) : भाजपमधून बाहेर पडून ठाकरे गटात जात वैजापूर मतदारसंघाची उमेदवारी मिळवणारे दिनेश परदेशी यांच्या निकटवर्तीयांवर आयकर विभागाची वक्रदृष्टी पडली आहे. वैजापूर मर्चंट बँकेचे अध्यक्ष रवींद्र संचेती, संचालक विनय सुराणा यांच्या घर व कार्यालयांवर छापेमारी करून चौकशी करण्यात आली. बुधवारी (६ नोव्हेंबर) सकाळी सहालाच २५ वाहनांचा ताफा एकाचवेळी धडकला. यात नागपूर, नाशिक, पुणे आणि छत्रपती संभाजीनगरच्या आयकर विभागांच्या तीन पथकांचा समावेश होता.
रवींद्र संचेती यांच्या वैजापूरमधील रोटेगाव रोडवरील निवासस्थानी सकाळी सहाला पथक आले. दुसरे पथक लगेचच सकाळी सातच्या सुमारास विनय सुराणा यांच्या छत्रपती संभाजीनगरातील निवासस्थानी, तर तिसरे पथक त्यांच्या कार्यालयावर पोहोचले. आयकर विभागाचे ४५ अधिकारी- कर्मचाऱ्यांकडून दोघांच्या व्यवहार आणि मालमत्तांची कसून चौकशी करण्यात आली. पथकांतील काही अधिकाऱ्यांनी सकाळी दहाला रवींद्र संचेती संचालक असलेल्या वैजापूर मर्चंट सहकारी बँकेत जात सायंकाळी उशिरापर्यंत तपासणी केली.
या चौकशीतून पथकाच्या हाती काय लागले, याबाबतची माहिती अद्याप देण्यात आलेली नाही. मात्र आज, ७ नोव्हेंबरलाही पथके चौकशी करण्याची शक्यता सूत्रांनी व्यक्त केली आहे. ठाकरे गटाचे वैजापूरचे उमेदवार दिनेश परदेशी यांच्या प्रचाराची धुरा रवींद्र संचेती यांनी सांभाळली आहे. यापूर्वी २९ ऑक्टोबरला दिनेश परदेशी यांची चौकशी करण्यात आली होती. त्यानंतर त्यांच्या निकटवर्तीयांची चौकशी केली जात आहे.
करचुकवेगिरी करून मोठी माया जमवल्याचा संशय आयकर विभागाला आहे. त्यामुळेच ही चौकशी सुरू असल्याचे सांगण्यात येते. ऐन निवडणुकीत सुरू असलेल्या छापेसत्रामुळे परदेशी यांची कोंडी झाली आहे. त्यांनी मुख्यमंत्री एकनाथ शिंदे यांच्यावर आरोप केले आहेत. परदेशी म्हणाले, की माझ्या उमेदवारीमुळे शिंदे गटाच्या पायाखालची वाळू सरकल्याने मुख्यमंत्र्यांनी दिल्लीकरवी हा खेळ सुरू केला आहे. यापूर्वी माझीही चौकशी केली. पण त्यांना काही सापडले नाही. त्यामुळे माझ्या निकटवर्तीयांना त्रास दिला जात आहे, असे ते म्हणाले.
.jpg)
