छ. संभाजीनगरचे व्यावसायिक नरेंद्र सारडा यांचा सांजूळच्या धरणात बुडून मृत्‍यू

फुलंब्री (सीएससीएन वृत्तसेवा) : ६० वर्षीय व्यावसायिकाचा फुलंब्री तालुक्यातील सांजूळ धरणात बुडून मृत्यू झाल्याची घटना रविवारी (११ ऑगस्ट) दुपारी चारच्या सुमारास घडली. पोहण्यासाठी उतरल्यानंतर पाण्याचा अंदाज न आल्याने ही दुर्घटना घडल्याचे समोर येत आहे. मृतदेह सोमवारी (१२ ऑगस्ट) सकाळी अकराला अग्निशमन दलाच्या जवानांनी तलावातून काढला. नरेंद्र परशुराम सारडा (रा. गारखेडा, छत्रपती संभाजीनगर) असे मृत्‍यू झालेल्या व्यावसायिकाचे नाव आहे.

व्यावसायिक प्रमोद वसंतराव जोशी (रा. सेवन हिल, छत्रपती संभाजीनगर) व नरेंद्र परशुराम सारडा हे दोघे मित्र सांजूळ येथील धरण परिसरात फिरण्यासाठी आले होते. यावेळी नरेंद्र सारडा यांना पोहण्याचा मोह झाला. त्यांनी कपडे काढून पाण्यात उडी घेतली. मात्र पाण्याचा अंदाज न आल्याने व धरणात गाळ जास्त असल्याने ते गाळात अडकले. त्यांना बाहेर पडता येत नव्हते.

प्रमोद जोशी यांनी जवळच्या शेतकऱ्यांना माहिती दिली. त्‍यामुळे त्‍यांनी सारडा यांना शोधण्याचा प्रयत्न केला. मात्र ते मिळून आले नाहीत. फुलंब्री पोलिसांना कळविण्यात आल्यानंतर पोलीस निरीक्षक संजय सहाने, पोलीस उपनिरीक्षक श्रीनिवास धुळे यांनी घटनास्थळी धाव घेतली. छत्रपती संभाजीनगर येथील अग्निशमन यंत्रणेला पाचारण करण्यात आले.

सायंकाळी सहापासून अग्निशमन दलाच्या जवानांनी सारडा यांचा शोध सुरू केला. रात्री उशिरापर्यंत शोध घेऊनही उपयोग झाला नाही. सोमवारी सकाळी सहापासून पुन्हा शोध सुरू केला असता सकाळी अकराला मृतदेह मिळून आला. फुलंब्री येथील ग्रामीण रुग्णालयात उत्तरीय तपासणी करून मृतदेह नातेवाइकांच्या ताब्यात देण्यात आला. छत्रपती संभाजीनगर येथे दुपारी चारला त्यांच्या पार्थिवावर अंत्यसंस्कार करण्यात आल्याचे सूत्रांनी सांगितले.