‘सिद्धार्थ’मध्ये घुमणार लवकरच सिंहाची डरकाळी!; विक्रम, रोहिणी-श्रावणी वाघ-वाघिणी जाणार कर्नाटकला...

By City News Desk

On 12 Aug 2025

‘सिद्धार्थ’मध्ये घुमणार लवकरच सिंहाची डरकाळी!; विक्रम, रोहिणी-श्रावणी वाघ-वाघिणी जाणार कर्नाटकला...

‌छत्रपती संभाजीनगर (सीएससीएन वृत्तसेवा) : सिद्धार्थ उद्यानातील पांढरा वाघ विक्रम, पिवळ्या वाघिणी रोहिणी आणि श्रावणी या कर्नाटक येथील शिवमोग्गा प्राणिसंग्रहालयाला देऊन त्‍याबदल्यात २ सिंह, २ अस्वल व २ कोल्हे घेण्यात येणार आहेत. या एक्सचेंज प्रक्रियेला केंद्रीय प्राणिसंग्रहालय प्राधिकरणाने परवानगी दिली आहे. शिवमोग्गाच्या दोन अधिकाऱ्यांनी सोमवारी (११ ऑगस्ट) छत्रपती संभाजीनगरला येऊन वाघांची पाहणी केली. आता पुढील आठवड्यात महापालिकेतील अधिकाऱ्यांचे पथक शिवमोग्गा येथे जाऊन सिंह, अस्वल, कोल्हे पाहून घेणार आहेत. त्‍यानंतर लगेचच प्राण्यांचे आदानप्रदान होईल.

सिद्धार्थ उद्यान प्राणिसंग्रहालयात सध्या १२ वाघ असून, ७ पिवळे तर ५ पांढरे वाघ आहेत. त्यांना ठेवण्यासाठी पिंजरे कमी पडत आहेत. शिवमोग्गा प्राणिसंग्रहालयाने वाघांची मागणी केंद्रीय प्राणिसंग्रहालय प्राधिकरणाकडे केली होती. गेल्या महिन्यात प्राधिकरणाने मंजुरी दिली. सिद्धार्थ प्राणिसंग्रहालयाने मोबदल्यात २ सिंह, २ अस्वल व २ कोल्हे मागितले, ते देण्याची तयारी शिवमोग्गाने दिली. सोबतच आणखीही काही प्राणी घेऊन जाण्याची ऑफर दिली आहे. शिवमोग्गाच्या अधिकाऱ्यांनी सिद्धार्थमध्ये वाघांची पाहणी केली. सर्व प्राण्यांची योग्य निगराणी घेतली जात असल्याबद्दल समाधान व्यक्‍त केले. शिवमोग्गाचे प्राणिसंग्रहालय तब्बल ६०० एकरांत विस्तारलेले आहे. तिथे स्वतंत्र सफारी पार्कही आहे. १८ किंवा १९ ऑगस्ट रोजी महापालिकेचे पथक शिवमोग्गा येथे जाणार असल्याचे सूत्रांनी सांगितले.