पुरस्कार सोहळ्यातच ढिश्यूमऽ ढिश्यूमऽ करणाऱ्या ३ शिक्षकांना अखेर कारणे दाखवा नोटीस, संत एकनाथ रंगमंदिरात घडला होता प्रकार

By City News Desk

On 16 Sep 2025

पुरस्कार सोहळ्यातच ढिश्यूमऽ ढिश्यूमऽ करणाऱ्या ३ शिक्षकांना अखेर कारणे दाखवा नोटीस, संत एकनाथ रंगमंदिरात घडला होता प्रकार

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : जिल्हा परिषद शिक्षण विभागातर्फे आयोजित आदर्श शिक्षक पुरस्कार वितरण सोहळ्यात संत एकनाथ रंगमंदिराच्या सभागृहाबाहेर तीन गुरुजींनी हाणामारी करत नवा आदर्श सर्वांसमोर ठेवला होता. हे शिक्षक उस्मानपुरा पोलिसांत तक्रार करायलाही गेले होते. पण प्रकरण आपल्यावरच शेकण्याच्या भीतीने त्‍यांनी आपसात घेतले. मात्र शिक्षकांच्या या कृतीमुळे शिक्षण क्षेत्राची नाचक्‍की झाली. शिक्षण विभाग काय कारवाई करणार, याकडे सर्वांचे लक्ष लागले होते. अखेर प्राथमिक शिक्षण विभागाने आता मारकुट्या गुरुजींना कारणे दाखवा नोटीस देण्याचा निर्णय घेतला आहे.

प्राथमिक विभागाच्या शिक्षणाधिकारी जयश्री चव्हाण सोहळ्याचे प्रास्ताविक करत होत्या. त्याचवेळी सभागृहाबाहेर दोन भाऊ असलेले शिक्षक आणि एका शिक्षक संघटनेचा पदाधिकारी यांच्यात वाद सुरू झाला. वादाचे रुपांतर लगेचच हाणामारीत झाले. हाणामारीत एकमेकांचे कपडे फाडण्यात आले. ज्‍या शिक्षकांत हाणामारी झाली. त्‍यांच्यात एका व्हॉट्‌स ॲप ग्रुपवर गेल्या काही दिवसांपासून वादावादी सुरू होती. पुरस्कार सोहळ्यात आमनेसामने येताच त्‍यांच्यातील खुमखुमी उफाळून आली होती. मात्र यामुळे शिक्षण विभागाची लक्‍तरे वेशीवर टांगली गेली. आता या घटनेची गंभीर दखल घेतल्याचे दाखवत शिक्षणाधिकारी जयश्री चव्हाण यांनी तिन्ही शिक्षकांना कारणे दाखवा नोटीस बजावली आहे. या शिक्षकांवर काय कारवाई केली जाते, की केवळ नोटीस देऊन पाठिशी घातले जाते, याकडे सर्वांचे लक्ष लागले आहे.