आदल्या रात्री किरकोळ वाद, दुसऱ्या दिवशी सकाळ होताच चाकूचे सपासप वार, रेल्‍वेस्टेशन परिसरातील थरार

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : आदल्या दिवशीच्या भांडणावरून तरुणावर चाकूने सपासप वार करत गंभीर जखमी करण्यात आल्याची घटना रेल्वेस्टेशन परिसरातील राजीवनगरात सोमवारी (१५ सप्‍टेंबर) सकाळी साडेआठला घडली. 

शेखर मिलींद चव्हाण (वय २६, रा. राजीवनगर रेल्वेस्टेशन परिसर) असे जखमी तरुणाचे नाव आहे. विजय मारुती भालेराव (रा. राजूनगर झोपडपट्टी) असे हल्लेखोराचे नाव आहे. शेखर कुटुंबासह राहतो आणि माती काम करून कुटुंबाचा उदरनिर्वाह चालवितो. तो सिगारेट घेण्यासाठी दुकानात जात असताना गल्लीतच राहणाऱ्या विजयने त्याला गाठले.

तू व तुझ्या बहिणीने माझ्या भावासोबत रात्री का भांडण केले, असे म्हणून त्याने शेखरला शिवीगाळ सुरू केली. यातून दोघांत वाद होऊन त्‍याने चाकू काढून शेखरवर सपासप वार केले. पाठ, कमरेवर वार केल्याने शेखर गंभीर जखमी  होऊन कोसळला. त्‍यानंतर विजय तिथून निघून गेला. शेखरला आई व बहिणीने घाटी रुग्णालयात दाखल केले आहे. अधिक तपास पोलीस अंमलदार प्रदीप डहाके करत आहेत.

बजाजनगरमध्ये अपघातात एकाचा मृत्‍यू
छत्रपती संभाजीनगर शहरातील बजाजनगर येथील कोलगेट चौकात सोमवारी (१५ सप्‍टेंबर) रात्री ९च्या सुमारास अंदाजे ४० ते ४५ वयोगटातील अनोळखी व्यक्तीचा डोक्यावरून चाक गेल्याने जागीच मृत्यू झाला. अपघातानंतर वाहतूक कोंडी झाली. पोलिसांनी वाहतूक सुरळीत केली. अपघात कोणत्या वाहनाने केला, याचा तपास वाळूज एमआयडीसी पोलीस करत आहेत.