छत्रपती संभाजीनगर (सीएससीएन वृत्तसेवा) : जिल्ह्यातील सरकारी रुग्णालयांत महिलांची प्रसुती सुखरुप होत आहेत. ऑगस्टमध्ये आरोग्य केंद्र व ग्रामीण रुग्णालये, उपजिल्हा आणि जिल्हा रुग्णालयांतील ३१४३ प्रसूती सुखरुप झाल्याची माहिती जिल्हा आरोग्य अधिकारी डॉ. अभय धानोरकर यांनी छत्रपती संभाजीनगर सिटी न्यूजला दिली.
जिल्ह्यातील ग्रामीण, उपजिल्हा, स्त्री,जिल्हा रुग्णालय, वैद्यकीय महाविद्यालय या ठिकाणी ३१४३ तर जिल्ह्यातील सर्वच प्राथमिक आरोग्य केंद्रांत ४६५ एवढ्या प्रसुती झाल्याची नोंद आहे. ही आकडेवारी केवळ ऑगस्ट महिन्यातील आहे. एवढ्या मोठ्या संख्येने महिलांचा ओढा सरकारी रुग्णालयाकडे का आहे, याबद्दल डॉ. धानोरकर यांनी रोचक माहिती सांगितली. ते म्हणाले, की गर्भवतींना वेळेत आणि मोफत रुग्णालयात दाखल होता यावे, यासाठी मोफत रुग्णवाहिकेचीही व्यवस्था करण्यात आलेली आहे.
तसेच सुरक्षित घरी पोहचविण्यासाठीही आरोग्य विभागाचे वाहन असल्याचे सांगण्यात आले. एखादी महिला गर्भवती असल्यापासूनच आशाताई, अंगणवाडी सेविकांमार्फत फॉलोअप घेतला जातो. समुपदेशन करून आरोग्य सल्लाही दिला जातो. वेळच्या वेळी तपासण्या केल्यास आणि वेळेत गर्भवतीला रुग्णालयात दाखल केल्यास भविष्यातील धोके टळू शकतात. त्यामुळे प्रत्येक प्रसुती ही शासकीय संस्थेत करावी, असे आवाहन जिल्हा आरोग्य अधिकारी डॉ. अभय धानोरकर, जिल्हा माता व बाल संगोपन अधिकारी डॉ. विशाल बेंद्रे अधिकारी यांनी केले आहे.
.jpg)
