धार्मिक भावना दुखावल्याचा आरोप करून करमाड पोलीस ठाण्यात जमवला मोठा जमाव!; नक्की काय घडलं...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : शेकटा (ता. छत्रपती संभाजीनगर) येथे दोन भिन्न धर्मीय व्यक्‍तींनी करमाड पोलीस ठाण्यात धार्मिक भावना दुखावल्याच्या तक्रारी दिल्या आहेत. त्यावरून पोलिसांनी दोघांविरुद्ध रविवारी (२८ सप्टेंबर) गुन्हा दाखल केला आहे.

पहिल्या तक्रारीत गणेश जनार्धन सोनवणे (वय २८, रा. शेकटा) याने म्हटले आहे, की तो खासगी नोकरी करतो. कुटुंबासह गावात राहतो. रविवारी सायंकाळी सहाला गावातील जालना- छत्रपती संभाजीनगर रोडवरील सय्यद समीर सय्यद गोरुपाशा याच्या पानटपरीवर गेला होता. गणेशने त्याला राम राम म्हणत नमस्कार घातला. त्यावर सय्यद समीरने वाईट शब्दांत बोलून धार्मिक भावना दुखावल्या. गणेशला त्याने शिवीगाळ केली. त्यानंतर गणेशने त्याचा भाऊ रमेश सोनवणे, राम भाऊसाहेब जाधव, प्रितम हिरचंद गोलवाल यांना घडलेला प्रकार सांगितला.

गणेश पोलीस ठाण्यात जाण्याआधीच सय्यद समीरने गावातील व परिसरातील मुस्लीम समाजातील जमाव जमवून गणेशविरुद्ध तक्रार करण्यासाठी पोलीस ठाणे गाठले. तेव्हा वाद वाढू नये म्हणून लोकांनी पोलीस ठाण्यात जाऊ दिले नाही. त्यामुळे गणेशने सोमवारी (२९ सप्टेंबर) पोलीस ठाण्यात जाऊन तक्रार दिली. त्यावरून पोलिसांनी सय्यद समीर सय्यदविरुद्ध गुन्हा दाखल केला आहे. दरम्यान, शुक्रवारी सायंकाळी धार्मिक वाद झाल्यानंतर सय्यद समीरने लगेचच जमाव जमवून पोलीस ठाणे गाठत तक्रार दिली.

त्यात म्हटले आहे, की तो शेकटा गावात पान टपरी चालवतो. पानटपरीवर तो असताना गणेश आला. तो म्हणाला की, संध्याकाळची वेळ आहे, तू लाईट चालू करताना देवाचे नाव घे. त्यावर सय्यद समीरने त्याला ऐसा क्यू? असा प्रश्न केला. त्यानंतर गणेशने त्याच्या धार्मिक भावना दुखावल्याने समीरने म्हटले आहे. त्याच्या तक्रारीवरून पोलिसांनी गणेशविरुद्ध गुन्हा दाखल केला आहे. अधिक तपास पोलीस उपनिरीक्षक भारत निकाळजे करत आहेत.