प्रा. जोगेंद्र कवाडे छ. संभाजीनगरात; म्हणाले, गणेशोत्सवाला राज्य उत्सवाचा दर्जा देणे, मंत्र्यांनीच वराह पूजन करणे असंवैधानिक!, ओबीसींना धक्का न लावता मराठा आरक्षण द्या!!

By City News Desk

On 27 Aug 2025

प्रा. जोगेंद्र कवाडे छ. संभाजीनगरात; म्हणाले, गणेशोत्सवाला राज्य उत्सवाचा दर्जा देणे, मंत्र्यांनीच वराह पूजन करणे असंवैधानिक!, ओबीसींना धक्का न लावता मराठा आरक्षण द्या!!

छत्रपती संभाजीनगर (सीएससीएन वृत्तसेवा) : सरकारने गणेशोत्सवाला राज्य उत्सवाचा दर्जा देणे, मंत्र्यांनीच वराह पूजन करणे हे असंवैधानिक असल्याचे मत पीपल्स रिपब्लिकन पार्टीचे संस्थापक अध्यक्ष प्रणेते प्रा. जोगेंद्र कवाडे यांनी मंगळवारी (२५ ऑगस्‍ट) छत्रपती संभाजीनगरमध्ये पत्रकार परिषद घेऊन केले. रिपब्लिकन ऐक्य प्रकाश आंबेडकरांनाच मान्य नसल्याचा आरोपही त्यांनी केला.

आरक्षणाचे वर्गीकरण करणे म्हणजे एससी म्हणून एकसंध असलेल्या समाजात फूट पाडणे होय. आम्ही पूर्वीपासूनच ओबीसींच्या आरक्षणाला धक्का न लावता मराठा समाजाला आरक्षण देण्याच्या मताचे असल्याचेही त्यांनी स्पष्ट केले. विचार न बदलता शिंदे गटाशी आमची युती आहे. युती करूनच आम्ही आगामी स्थानिक स्वराज्य संस्थांच्या निवडणुका लढवणार आहोत.

आमच्या वाट्याला समाधानकारक जागा मिळण्याची अपेक्षा आहे. तशी चर्चा ठाण्यात खा. डॉ. श्रीकांत शिंदे यांच्याशी झाल्याचे त्‍यांनी सांगितले. अनुसूचित जातीच्या लोकांवर अन्याय, अत्याचार वाढल्याचे प्रा. कवाडे म्हणाले. जिल्हाधिकारी कार्यालयासमोर सुरू असलेल्या मेल नर्सेसच्या बेमुदत उपोषणाला कवाडे यांनी भेट दिली. पत्रपरिषदेला जयदीप कवाडे, ज्येष्ठ नेते गोपाळराव आटोटे, सिद्धार्थ नेतने, रामदास लोखंडे,आनंद बोर्डे आदींची उपस्थिती होती.