चालकाला फिट आल्याने नियंत्रण सुटून कार थेट दुभाजकावर!, सेव्हन हीलजवळील घटना

By City News Desk

On 28 Aug 2025

चालकाला फिट आल्याने नियंत्रण सुटून कार थेट दुभाजकावर!, सेव्हन हीलजवळील घटना

छत्रपती संभाजीनगर (सीएससीएन वृत्तसेवा) : कार चालवतानाच अचानक फिट आल्याने चालकाचे स्टिअरिंगवरचे नियंत्रण सुटले. त्यामुळे कार दुभाजकावर चढली. सुदैवाने दाम्पत्याने सीटबेल्ट लावलेले असल्याने सर्व एअरबॅग्ज उघडल्या गेल्या आणि गंभीर दुखापत झाली नाही. ही घटना सेव्हनहीलजवळील राज पेट्रोल पंपासमोर बुधवारी (२७ ऑगस्ट) दुपारी तीनच्या सुमारास घडली.

याच ठिकाणी वारंवार अपघात होत असून, वाहने दुभाजकावरच चढत आहेत. याची कारणे शोधून उपाययोजना करण्याची मागणी होत आहे. सूरज खुशालसिंह राजपूत (वय ३२, रा. हनुमाननगर) आणि पत्नी पल्लवी यांच्यासह कारने (क्र. एमएच २० ईजे ४३३४) हायकोर्टाकडून आकाशवाणीकडे जात होते. सेव्हन हिल उड्डाण पुलावर चढण्याच्या तयारीत असतानाच राज पेट्रोलपंपासमोर त्यांना अचानक फिट येण्याचा त्रास सुरू झाला. कारवरील नियंत्रण सुटून त्यांचा पाय एक्सलेटरवर पडला अन्‌ कार दुभाजकावर जोरात आदळली. दाम्‍पत्‍याने सीट बेल्ट लावलेला होता. त्यामुळे अपघात होताच एअरबॅग्ज उघडल्या गेल्या. त्यामुळे दाम्‍पत्‍य सुरक्षित राहिले. माहिती मिळताच पुंडलिकनगर पोलीस ठाण्याचे पोलीस अंमलदार मोतीराम होलगडे, अमोल आहेर, मदन गोरे यांनी घटनास्‍थळी धाव घेऊन मदतकार्य केले. कार रस्‍त्‍याच्या बाजूला घेऊन वाहतूक सुरळीत केली.