छ. संभाजीनगर ३ तरुणांची गळफास घेऊन आत्‍महत्‍या, सिल्लोड, गंगापूर, पैठण तालुक्‍यातील दुर्दैवी घटना

छत्रपती संभाजीनगर (सीएससीएन वृत्तसेवा) : जिल्ह्यात ३ तरुणांची टोकाचे पाऊल उचलले. सिल्लोड तालुक्‍यातील वडोदचाथा, गंगापूर तालुक्यातील पुरी, पैठण तालुक्यातील कोळी बोडखा येथे या घटना घडल्या. तिघांच्या आत्‍महत्‍येचे कारण अद्याप समोर आलेले नाही.

सिल्लोड : २९ वर्षीय युवकाने शेतात घेतला गळफास
दीपक त्रिंबक चाथे (वय २९, रा. वडोद चाथा, ता. सिल्लोड) याने गावाजवळीलच शेतात गळफास घेऊन आत्महत्या केली. ही घटना मंगळवारी (२६ ऑगस्ट) दुपारी २ ला समोर आली. दीपकने गावातील लक्ष्मण जगताप यांच्या शेतातील चिंचेच्या झाडाला गळफास घेतला. शेतात गेलेल्या शेतकऱ्याच्या निदर्शनास ही घटना आली. दीपकला शेतकऱ्यांनी सिल्लोडच्या उपजिल्हा रुग्णालयात आणले असता डॉक्टरांनी तपासून मृत घोषित केले.

गंगापूर : मोबाइल घरी ठेवून बाहेर पडत आत्‍महत्‍या
कुणाल गोपीचंद घटे (वय २५, रा.पुरी, ता. गंगापूर) याने गाव शिवारातील बाभळीच्या झाडाला गळफास घेऊन आत्महत्या केली. ही घटना मंगळवारी सकाळी साडेअकराला समोर आली. मंगळवारी सकाळी फोन घरी ठेवून कुणाल बाहेर पडला. बराच वेळ झाल्याने घरी न परतल्याने त्याची आई त्याला शोधत होती. गावाजवळील संतोष भंडारी यांच्या शेतात बाभळीच्या झाडाला तो गळफास घेतलेल्या अवस्थेत आढळला. गंगापूर पोलिसांनी घटनेचा पंचनामा केला. उत्तरीय तपासणीनंतर कुणालचा मृतदेह कुटुंबीयांच्या स्वाधीन करण्यात आला. सायंकाळी कुणालच्या पार्थिवावर अंत्यसंस्कार करण्यात आले. त्याच्या पश्चात आई-वडील, तीन बहिणी आहेत.

पैठण : मोलमजुरी करणाऱ्या युवकाची आत्‍महत्‍या
शेख जाकीर (वय ४०, रा. कोळीबोडखा, ता. पैठण) यांनी सोमवारी (२५ ऑगस्ट) रात्री १० च्या सुमारास राहत्या घरात गळफास लावून आत्महत्या केली. ते मोलमजुरी करत होते. काही दिवसांपासून चिंतित होते. त्‍यांनी गळफास घेतल्याचे लक्षात येताच कुटुंबीयांनी पाचोड येथील ग्रामीण रुग्णालयात दाखल केले. वैद्यकीय अधिकारी डॉ. आसाराम चौरे यांनी तपासून शेख जाकेर यांना मयत घोषित केले. मंगळवारी दुपारी शेख जाकेर यांचा कोळी बोडखा गावात दफन विधी करण्यात आला. त्यांच्या पश्चात आई, भाऊ, पत्नी, तीन मुले असा परिवार आहे. घटनेची नोंद पाचोड पोलिसांनी केली आहे.