जिल्हा प्रशासनाने घेतला नगरपालिका, नगरपंचायत निवडणुकीसाठी आढावा, आचारसंहितेची अंमलबजावणी होणार कडक

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : नगरपालिका व नगरपंचायत निवडणूक कार्यक्रम घोषित झाला असून याबबत करावयाच्या विविध उपाययोजना व कारवाईबाबत जिल्हाधिकारी कार्यालयात शुक्रवारी (७ नोव्‍हेंबर) आढावा बैठक घेण्यात आली. नगरपालिका, नगरपंचायत क्षेत्रात आचारसंहिता अंमलबजावणी व निवडणूक प्रक्रियेतील पारदर्शकता यास प्राधान्य द्यावे, असे निर्देश जिल्हाधिकारी दिलीप स्वामी यांनी दिले.

जिल्हाधिकारी कार्यालयातून दूरदृष्यप्रणालीद्वारे या बैठकीचे आयोजन करण्यात आले. जिल्हाधिकारी दिलीप स्वामी, पोलीस अधीक्षक डॉ. विनयकुमार राठोड, उपजिल्हा निवडणूक अधिकारी देवेंद्र कटके, निवासी उपजिल्हाधिकारी जनार्दन विधाते, उपजिल्हाधिकारी डॉ. सुचिता शिंदे, संगिता राठोड, एकनाथ बंगाळे, उपविभागीय अधिकारी संतोष गोरड, नीलम बाफना, लतिफ पठाण, नगरपालिका प्रशासन सहायक आयुक्त  ऋषिकेश भालेराव, उपविभागीय पोलीस अधिकारी, नगरपालिका मुख्याधिकारी आदी उपस्थित होते.

जिल्हाधिकारी स्वामी म्हणाले, की प्रत्येक नगरपालिका क्षेत्रात निवडणुकांसाठी आवश्यक सज्जता करावी. जिल्हा प्रशासनाकडून निवडणुकीसंदर्भात द्यावयाचे सहाय्य देण्यात येईलच. तथापि स्थानिक पातळीवर कायदा व सुव्यवस्था, आचारसंहिता अंमलबजावणी याबाबत अधिक दक्षतेने काम करावे. संपूर्ण निवडणूक प्रक्रिया पारदर्शकपणे राबवावी, असे निर्देश त्यांनी दिले. पोलीस अधीक्षक डॉ. राठोड म्हणाले, की स्थानिक पातळीवर कायदा व सुव्यवस्था राखण्यासाठी प्रतिबंधात्मक कारवाईचा कृती आराखडा तयार ठेवावा. तसे प्रस्ताव पाठवावे. मद्य व पैसे यांच्या अवैध वाहतुकीवर निगराणी ठेवावी. सोशल मिडीयावर बारकाईने लक्ष ठेवून संवेदनशील विषयांबाबत वेळीच प्रतिबंधात्मक उपाययोजना करावी, असे त्यांनी सांगितले.