छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर शहर पोलिसांनी ड्रग्ज बाजारावर मोठा घाव घातला आहे. कुख्यात ड्रग्ज स्मगलर शेख अश्पाक शेख इसाक (वय ३२, रा. रवींद्रनगर) याच्यासह त्याच्या टोळीतील १५ जणांना ‘मोक्का’ कायदा लावला आहे. सोमवारी (२३ मार्च) पोलीस आयुक्त प्रवीण पवार यांनी हा निर्णय घेतला.
‘मोक्का’ लावलेल्यांत अश्पाक शेखसह त्याचा साथीदार दाऊद मुनावर पठाण (वय २८, रा. बायजीपुरा) व सरफराज मिर्झा हाफिज बेग (वय २७, रा. शहाबाजार), शेख कलीम शेख सरदार, शेख मुस्ताक शेख इसाक, अविनाश ऊर्फ आवड्या शेषराव पाचुंदे, शेख सोहेल शेख सत्तार, अजय अनिल साळवे, शेख समीर शेख राजासाब, सय्यद अल्ताफ वहाब, सय्यद शाहेद अली सय्यद इब्राहिम, सय्यद रहीम सय्यद अन्वर, शेख हाफिज शेख सलीम, अनिता अविनाश पाचुंदे व अश्पाकचे व्यवहार सांभाळणारी इशरत अकीब शेख यांचा समावेश आहे.
ही टोळी लातूर, उदगीरमधून शहरात नशेच्या सिरपच्या बाटल्या आणायचे. २५ जानेवारीपासून या टोळीविरुद्ध सुरू केलेल्या कारवाईत आतापर्यंत १८ जणांना अटक करण्यात आली. म्होरक्या अश्पाकला १८ फेब्रुवारी रोजी शहर गुन्हे शाखेचे वरिष्ठ पोलीस निरीक्षक गजानन कल्याणकर यांनी नाशिकच्या हॉटेलमधून अटक केली होती.
अब तक ४८...शहर पोलीस आयुक्त प्रवीण पवार यांनी शहरात नशेचा बाजार चालवणारे अजय ठाकूर, मुकेश साळवे, रवी काळे, सय्यद फैजल ऊर्फ तेजा सय्यद एजाज, शेख जावेद ऊर्फ टिप्या, सुमित रुपेकर यांच्यासह त्यांच्या ४८ साथीदारांवर ‘मोक्का’ कायद्याखाली कारवाई केली आहे. यातून संघटीत गुन्हेगारी संपुष्टात आणण्याचा त्यांचा प्रयत्न दिसून येत आहे.
.jpg)
.jpg)
