छत्रपती संभाजीनगर (मेट्रोपोलिस पोस्ट वृत्तसेवा) : घाटी रुग्णालयाच्या प्रवेशद्वाराजवळ ड्रग्ज तस्कराला ताब्यात घेऊन पोलिसांनी नशेच्या गोळ्या आणि सिरपचा मोठा साठा जप्त केला. ही कारवाई आज, २४ मार्चला पहाटे एकच्या सुमारास (मध्यरात्री) करण्यात आली. तौफिक रशीद अली (रा. हारुण मसालेवाले यांच्या घरात भाड्याने चांदमारी, कश्मीर मोहल्ला, छत्रपती संभाजीनगर) असे पकडलेल्या ड्रग्ज तस्कराचे नाव आहे.
पोलीस अंमलदार कैलास गाडेकर यांच्या तक्रारीवरून तौफिकविरुद्ध बेगमपुरा पोलीस ठाण्यात गुन्हा दाखल करण्यात आला आहे. अंमली पदार्थ विरोधी टास्क फोर्सला गोपनीय माहिती मिळाली, की एक तरुण मोपेडवरून घाटी रुग्णालय परिसरात नशेसाठीची औषधी विकण्याठी येणार आहे. पथकाने छाप्याचे नियोजन केले. आज, २४ मार्चला पहाटे साडेबाराच्या सुमारास (मध्यरात्री) घाटी रुग्णालय परिसरात पथक दाखल झाले. मुख्य प्रवेशव्दाराच्या आजूबाजूला सापळा लावून थांबले. पहाटे एकच्या सुमारास ॲक्टिवा मोपेडेवरून (क्र. एमएच २०, डीबी १३०५) संशयित तरुण आला. पोलिसांनी त्याला थांबण्याचा इशारा करून ताब्यात घेतले. तौफिक रशीद अली (रा. हारुण मसालेवाले यांच्या घरात भाड्याने चांदमारी, कश्मीर मोहल्ला, छत्रपती संभाजीनगर) असे त्याचे नाव समोर आले.
त्याच्या अंगझडतीतून मोबाइल जप्त करण्यात आला. मोपेडच्या डिक्कीत पिवळ्या पॉलीथीन बॅगमध्ये औषधी गोळ्यांची पाकिटे मिळून आली. प्रत्येकी १० गोळ्या असलेल्या २४० स्ट्रिप्स अशा एकूण २४०० गोळ्या, काळ्या कापडी पिशवीत नशेच्या सिरपच्या १४ बाटल्या आणि मोपेड असा एकूण १० लाख १६ हजार ४७१ रुपयांचा मुद्देमाल जप्त करण्यात आला. जप्त केलेल्या औषधी गोळ्या व सिरप हे ड्रग्स असून जवळ बाळगणे, विक्री करणे यासाठी औषधी परवाना असणे बंधनकारक आहे. त्याच्या सेवनाकरिता डॉक्टरांचे प्रिस्क्रीप्शन असणे आवश्यक आहे. या औषधींचा नशा करण्याकरिता अंमली पदार्थ म्हणून गैरवापर केला जातो. अधिक तपास पोलीस निरीक्षक पाडळकर करत आहेत.
.jpg)
.jpg)
